Heyətini gücləndirməyə çalışan “Neftçi” hazırda bir neçə legionerlə danışıqlar mərhələsindədir. Deyilənlər doğrudursa, bakılılar səs-küyə səbəb olacaq ən azı 2 futbolçu transfer edəcək.

Prosport.Az futbolinfo.az-a istinadən xəbər verir ki, çempionluq uğrunda mübarizə aparacaq heyət formalaşdırmağa çalışan bakılılar bunun üçün düşərgədə olan bəzi oyunçularla da vidalaşmalıdır. Faydası az, maaşı çox olan iki futbolçu var və rəhbərlik onlarla vidalaşmağın yolunu axtarır.

Siyahıya milli komandamızın üzvü Ramil Şeydayev başçılıq edir. Baş məşqçi Samir Abasov hücumçuya ehtiyac duymadığını və hətta onu təlim-məşq toplanışına aparmayacağını bildirib. Ramil komandada qalmağa qərar versə, əvəzedici heyətlə məşq etməli olacaq. Müqaviləsi davam edən forvard əla qazancı itirməmək üçün buna da razı olacağını bildirib. Klub hazırda onu yola gətirməyə çalışır.

Digər belə oyunçu Andrey Ştoqrindir. 27 yaşlı ukraynalı cinah oyunçusu da müqaviləyə qarşılıqlı razılıqla xitam vermək istəmir. Futbolçuya müştəri yoxdur, özü isə kiçik təzminat qarşılığında getmək istəmir. “Neftçi” üçün hazırda prioritet hədəf bu cütlüyün yola salınmasıdır.

Xüsusilə Stoqrinin vidası qaçılmazdır. Legionerlərə görə ödəniləcək rüsuma görə heyətin boşaldılması, əcnəbi sayının azaldılması vacibdir. Andrey də bunu bildiyindən güzəştə getmir və qovulmasını gözləyir.