"Qarabağ" yeni mövsüm üçün 2-ci transferini reallaşdırıb.

Prosport.Az xəbər verir ki, Portuqaliyanın elitasına vəsiqə qazanmış “Alverka” klubu ilə aparılan danışıqlar uğurla nəticələnib və dayaq yarımmüdafiəçisi Pedro Bikalyo heyətə cəlb olunub.

Ağdam təmsilçisi ilə 24 yaşlı braziliyalı futbolçu arasında "3+1" illik müqavilə imzalanıb. Yarımmüdafiəçi “Qarabağ”da 35 nömrəli forma ilə çıxış edəcək.

Peşəkar karyerasına 2020-ci ildə “Kruzeyro”da başlayan Pedro 1 il sonra “Palmeyras”a keçib. O, bu klubla 2021-ci ildə Libertadores Kubokunun qalibi adını qazanıb.

Yarımmüdafiəçi icarə əsasında Braziliyanın “Vitoriya”, Portuqaliyanın “Santa Klara” və “Alverka” klublarında çıxış edib.

Qeyd edək ki, Pedro Bikalyo komandadan müqaviləsi başa çataraq ayrılan kabo verdeli Patrik Andradenin yerinə transfer olunub.

Xatırladaq ki, "Qarabağ" daha əvvəl Portuqaliyanın "Torensi" klubundan braziliyalı sağ cinah müdafiəçisi Dani Boltu heyətinə qatmışdı. Onunla da 3+1 illik müqavilə bağlanmışdı.