İspaniyanın "Espanyol", İngiltərənin "Mançester Siti", "Liverpul", Yunanıstanın "Olimpiakos", Türkiyənin "Qalatasaray" klublarının sabiq futbolçusu Albert Riera Azərbaycana gələcək.

Prosport.Az-ın xəbərinə görə, 43 yaşlı ispaniyalı veteranın ölkəmizə gəliş səbəbi baş məşqçisi olduğu Sloveniyanın "Selye" komandasının UEFA Avropa Liqasının I təsnifat mərhələsində "Sabah"a rəqib olmasıdır.

Albert Riera 2023-cü ildə "Selye"ni çalışdırsa da, daha sonra Fransanın "Bordo" klubundan gələn təklifə görə oradan ayrılıb. O, ötən ilin iyulun 29-da "Selye"yə yenidən qayıdıb və 2 illik müqavilə bağlayıb. Komanda onun rəhbərliyi altında ötən mövsüm UEFA Konfrans Liqasında 1/4 finaladək irəliləyib.

Qeyd edək ki, "Selye" iyulun 10-da Masazır qəsəbəsindəki "Bank Respublika Arena"da "Sabah"ın qonağı olacaq. 1 həftə sonra isə Sloveniyanın 3-cü şəhəri olan Selyedə cavab matçı təşkil ediləcək.