I Liqa təmsilçisi "Mingəçevir" klubu barədə xəbərlər səngimək bilmir.

Prosport.Az-ın xəbərinə görə, artıq klubun təsisçisi Ruslan Həmidov postundan uzaqlaşdırılıb.

O, müqaviləyə qol çəkməklə təsisçi kimi hüquqlarından imtina edib. Həmçinin, kluba yeni rəhbər təyin olunub. Belə ki, klubda əməkdaşlarla işbirliyi onun üzərindən edilir.

Bu, hazırda Azərbaycan Voleybol Federasiyasının icraçı direktoru işləyən Vüqar Hüseynzadədir.

33 yaşlı Vüqar Hüseynzadə isə futbol camiəsinə tanış simadır. O, 2012-ci ilin fevralında (20 yaşında) Hafiz Məmmədovun prezidenti olduğu "Bakı" klubunda əvvəlcə müşavir, həmin ilin noyabrında isə A komandanın meneceri təyin olunub. Onun futbol klubuna "Football Manager" kompüter oyununun qalibi olmasına görə təyin olunması o zaman BBC, ESPN, "New York Times" kimi məşhur nəşrlərdə böyük təəccüblə qarşılanıb. Ancaq onun "Bakı" fəaliyyəti çox qısa çəkib. Lakin onun "Bakı"dan niyə ayrıldığı haqda heç bir rəsmi məlumat verilməyib.

Qeyd edək ki, komandanı ötən mövsüm I Liqada son pillədən 4-cü yerə qaldıran "Mingəçevir" komandasının baş məşqçi Füzuli Məmmədovla da yolları ayıracağı gözlənilir. Tərəflər maaş məsələsində razılığa gələ bilmir. Onun yerinə Mingəçevir futbolunun yetirməsi olmuş məşqçi Ramiz Məmmədovun təyin olunacağı ehtimal edilir.