"Bu, karyeramda son dərəcə vacib bir fəsilin sonudur. Bütün “Qarabağ” klubuna, rəhbərliyə, məşqçilərə (Qurban Qurbanov, hər şey üçün təşəkkür edirəm), personala, azarkeşlərə və əlbəttə ki, komanda yoldaşlarıma təşəkkürümü bildirmək üçün söz tapmaqda çətinlik çəkirəm”.

Prosport.Az xəbər verir ki, bu sözlər “Qarabağ”la yollarını ayıran Yassin Benziyaya məxsusdur.

Əlcəzair millisinin 30 yaşlı yarımmüdafiəçisi “İnstaqram”da “Qarabağ”a vida paylaşımında həmçinin yazıb:“Başımın üzərindən keçən bütün hadisələrdən sonra məhz burada yenidən oynamaq sevincini tapdım. Kuboklar qazanmaq, qol vurmaq, komanda yoldaşlarıma qol ötürmələri vermək, komandamızın Avropada parlamasına kömək etmək, milli komandaya qayıtmaq… Sadəcə hər şey üçün təşəkkür edirəm. Həmişə qəlbimdə qalacaqsınız”.

Benziya 2023-cü ilin yanvarından “Qarabağ”da oynayırdı. O, bu komandada 104 oyun keçirib, 28 qol vurub, 25 qolun isə ötürməsini edib.