Azərbaycan millisinin hücumçusu Renat Dadaşovun çıxışı ilin əvvəlində onunla yollarını ayıran “Ankaragücü” klubunda peşmanlığa yol açıb.

Prosport.Az Türkiyə mətbuatına istinadən xəbər verir ki, 26 yaşlı forvardın həm Polşa klubu “Radomyak”da, həm də Azərbaycan millisində yüksək performans göstərməsi və ardıcıl qollar vurması ankaralıları yanlış addım atmaq düşüncəsinə vadar edib.

Belə ki, I Liqa klubunun məşqçi korpusu və rəhbərliyi Dadaşovu heyətdən uzaqlaşdırmaq və onu “Radomyak”a satmaqla doğru qərar vermədiklərini etiraf edib. Çünki paytaxt təmsilçisi hələ də onun yoxluğunu hiss edir. Hətta xəbərdə Dadaşovun yay fasiləsində Avropanın önəmli klublarından birinə keçmək ehtimalının da yüksək olduğu vurğulanıb. Bir neçə klubun onunla maraqlandığı bildirilir.

Qeyd edək ki, Renat Dadaşovun “Radomyak”la müqaviləsi bu ayın sonuna qədərdir. Sözləşmə müddətinin daha bir 1 uzadılması bəndi hələ razılaşdırılmayıb.