Latviya və Azərbaycan futbol komandaları arasında Riqada qolsuz heç-heçə ilə başa çatan yoldaşlıq oyunundan sonra millimizin baş məşqçisi Fernandu Sentuşun iştirakı ilə mətbuat konfransı keçirilib.

Prosport.Az-ın Riqaya ezam olunmuş əməkdaşı portuqaliyalı məşqçinin fikirlərini təqdim edir:

– Düşünürəm ki, komanda yaxşı təşkil olunmuşdu. İlk 15-20 dəqiqədə bir az topa nəzarətdə problemlərimiz vardı. Bir istiqamətdə hücum qururduq, digər istiqamətə topu önəldə bilmirdik. Daha sonra bu vəziyyəti düzəltdik və ümumilikdə komanda yaxşı çıxış etdi. 2-ci hissədə topa nəzarət bizdə idi. Rəqib qapısına təhlükəli vəziyyət yaradırdıq. Ümumi götürdükdə, rəqib bizim qapımız qarşısında heç nə yarada bilmədi. Yeganə çatışmayan amil rəqibin qapısı önündə vəziyyətlərdən yararlana bilməməyimiz oldu. Hətta məşqlərdə də bunu etmişdik. Uzaqdan zərbələr vura bilmədik.

– Azərbaycandan bura topa nəzarət etməyə gəlmişdik?
– Əlbəttə, qələbə qazanmağa gəlmişdik. Topa nəzarət yoxdursa, qələbə də olmur. Təhlükəli epizodlar da oldu, ancaq zərbə vura bilmədik.

– Əsas qol ümidimiz Mahir Emreli 2 metrdən qapıya zərbə vura bilmir...
– Bu da futbolun bir hissəsidir. Nəriman Axunzadə, Anatoli Nuriyevin də vəziyyəti oldu, ancaq qapıya zərbə endirə bilmədilər. Futbolda belə olur. Estoniya ilə oyun istisna olmaqla, digər oyunlarımızda top buraxmışdıq. Bu dəfə isə Latviya, demək olar ki, qapımıza zərbə vura bilmədi.

– Elvin Bədəlovun durumu necədir?
– Ayağı burxulub. Həkimlər onun yekun durumu haqda məlumat verəcək.

Səbuhi Musa
Riqa