"Bu oyunu səbirsizliklə gözləyirəm. Maraqlı matç olacaq. Özüm də oyuna baxmağa gedəcəyəm". 

Bu sözləri Prosport.Az saytının Latviyanın paytaxtı Riqaya ezam olunmuş əməkdaşına müsahibəsində millimizin sabiq futbolçusu Vüqar Əskərov deyib.

Sumqayıtda doğulmuş, ancaq Riqada yaşayan V.Əskərov sabah keçiriləcək Latviya – Azərbaycan yoldaşlıq matçı ilə bağlı fikirlərini bildirib. "Sumqayıt", "Araz-Naxçıvan" və "Zirə"nin sabiq futbolçusu favoritin meydan sahibləri olduğunu vurğulayıb:

"Fikrimcə, Latviya bu matçda favoritdir. Ancaq istərdim ki, Azərbaycan millisi qalib gəlsin. Özüm azərbaycanlı kimi Azərbaycan millisinə azarkeşlik edəcəyəm".

40 yaşlı sabiq futbolçu 2004-cü il iyunun 6-da və 2018-ci il iyunun 9-da yoldaşlıq oyununda Latviya ilə keçirilən matçları xatırlayıb: "Xatırlayıram ki, Azərbaycan millisi 2004-cü ildə Latviya ilə burada 2:2 oynamışdı, Qurban Qurbanov da qol vurmuşdu. Qurban Qurbanov baş məşqçi olarkən isə Dauqavada Azərbaycan yoldaşlıq oyununda Latviyanı 3:1 məğlub etmişdi. Azərbaycan çoxdandır ki, qələbə qazanmır. Bəlkə bu dəfə sindromu sındırarlar".

2012-2013-cü illərdə millimizdə 3 oyun keçirmiş V.Əskərov meydan sahiblərinin təhlükəli futbolçularının adlarını da açıqlayıb: "Latviya millisində yaxşı oyunçular var. Yaanis İkaunieks, Kristers Tobers, Andrey Çıqanik, 21 yaşlı Luukas Vapne yaxşı futbolçulardır. Vladislav Qutkovski yaxşı hücumçudur. Latviya millisində legioner həyatı yaşayan futbolçular az deyil".

Vüqar Əskərov matça Riqada yaşayan azərbaycanlıların gələcəyini də bildirib: "Bu oyuna çoxlu azərbaycanlı baxmağa gələcək. Riqada çox sayda azərbaycanlı yaşayır. Komandamıza sabah uğurlar arzulayıram".

Qeyd edək ki, "Skonto" stadionunda keçiriləcək Latviya – Azərbaycan oyunu sabah Bakı vaxtı ilə saat 17:00-da başlayacaq.

Səbuhi Musa