Yeni futbol mövsümündə Premyer Liqada iştirakı dəqiqləşmiş "İmişli" klubunun baş məşqçi təyinatını açıqlamamasının səbəbi bilinib.

Prosport.Az-ın əldə etdiyi xəbərə görə, ötən mövsüm komandanı çalışdırmış Fərid Namazovla yolların ayrıldığına dair məlumatın hələ də açıqlanmaması bir sıra suallar doğurub. 

Bu, həmin məşqçinin Pro (Professional) kateqoriyası oxuması ilə bağlıdır. Belə ki, Fərid Namazov 10-18 iyun tarixlərində Pro məşqçilik kursu üçün Slovakiyada olacaq. O orada 8 şəhərdə keçiriləcək 21 yaşadək millilərin Avropa çempionatı matçlarında yer alacaq. Klub onun bütün səfər xərclərini öz üzərinə götürüb.

"İmişli" onunla yollarını ayırdığını açıqlasa, o zaman Fərid Namazov bu kursda iştirak edib, Pro kateqoriyası ala bilməyəcək. Bu səbəbdən klub yeni baş məşqçi təyinatını yubadır.

"İmişli"nin yeni baş məşqçisi isə portuqaliyalı Jorje Kaskilya olacaq. 56 yaşlı məşqçi sonuncu dəfə Çexiyanın 3-cü Liqa təmsilçisi "Znoymo" komandasını çalışdırıb. Orada onunla işləmiş həmyerlisi Kristianu Souza isə onun köməkçisi olacaq.

Səbuhi Musa