AFFA İntizam Komitəsi "Qarabağ" və "Sabah" klubunu cərimələyib.

Prosport.Az xəbər verir ki, İK-in bugünkü iclasında tərəflər arasında keçirilmiş Azərbaycan Kubokunun final oyununda yaşananlara hüquqi qiymət verilib.

"Qarabağ" klubuna 4 nəfər sarı vərəqə aldığı üçün 700 manat cərimə kəsilib. Ağdam təmsilçisinin məşqçisi Müşfiq Hüseynov 120-ci dəqiqədə meydana daxil olaraq hakimin qərarına etiraz edib. Birbaşa qırmızı vərəqə alan mütəxəssis 2 oyunluq cəza alıb. Kluba 1500 manat cərimə tətbiq olunub.

Komandanın futbolçusu Yassin Benziya referini təhqir etdiyinə görə birbaşa "qırmızı" görüb. O, ardınca ədalət təmsilçilərinə fiziki təzyiq göstərməyə cəhd edib və bu səbəbdən 5 matçlıq cəza ilə üzləşib. "Qarabağ" oyunçunun davranışına görə 3000 manat ödəməli olacaq. "Köhlən atlar" azarkeşlərin pirotexniki vasitədən istifadəsi ucbatından 1500 manat ziyana düşüb.

"Sabah"a isə 5 futbolçu sarı vərəqə aldığından 700 manat, fanatların pirotexniki vasitədən istifadəsinə görə 1500 manat cərimə kəsilib.

Qeyd edək ki, rəqibini əlavə vaxtda 3:2 hesabı ilə üstələyən "Sabah" Azərbaycan Kubokunun sahibi olub.