Taekvondoçularımız Avropa Oyunlarına lisenziya xarakterli yarışda iştirak edəcək

Prosport.Az xəbər verir ki, aprelin 8-də Rumıniyanın paytaxtı Buxarestdə III Avropa Oyunlarının taekvondo yarışına lisenziya xarakterli təsnifat turniri start götürəcək. 2 gün davam edəcək mübarizədə Azərbaycan millisi də vəsiqələr uğrunda gücünü yoxlayacaq.

Yarışda baş məşqçi Reza Mehmandustun rəhbərliyi altında Səyyad Dadaşov (54 kq), Xanoğlan Kərimov (63 kq), Ələsgər Əliyev (80 kq) və Həmidrza Bədriəliabadi (+87 kq) qüvvəsini sınayacaq. Turnirdə hər çəki dərəcəsinin qalibi Avropa Oyunlarında iştirak hüququ qazanacaq.

Bu gün Rumıniyaya yollanan komandamız aprelin 10-da Bakıya qayıdacaq.

Qeyd edək ki, Polşanın Krakuv şəhəri və Mavopolska bölgəsində keçiriləcək III Avropa Oyunlarında artıq 7 taekvondoçumuzun iştirakı təsdiqlənib. Reytinqə əsasən, Həşim Məhəmmədov (58 kq), Cavad Ağayev (68 kq), Eltac Qafarov (74 kq), Taleh Süleymanov (87 kq), Minayə Əkbərova (46 kq), Patimat Abakarova (49 kq) və Fəridə Əzizova (67 kq) Avropa Oyunlarına vəsiqə əldə ediblər. Avropa Oyunlarında taekvondo yarışları iyunun 23-26-da keçiriləcək.