Futbol üzrə Azərbaycan Kubokunun qalibi müəyyənləşib.

Prosport.Az xəbər verir ki, final oyununda "Qarabağ" və "Sabah" komandaları üz-üzə gəlib.

Mehdi Hüseynzadə adına Sumqayıt şəhər stadionundakı matçda "Sabah" sevinən tərəf olub.

Görüşdə hesab 36-cı dəqiqədə açılıb. Bakı klubunun heyətində slovakiyalı Pavol Şafranko penaltini dəqiq yerinə yetirib. 43-cü dəqiqədə Ağdam təmsilçisinin oyunçusu Toral Bayramov 11 metrlik cərimə zərbəsindən yararlana bilməyib. Əvəzində 45+1-ci dəqiqədə onun braziliyalı komanda yoldaşı Kadi Borjes hesabı bərabərləşdirib.

57-ci dəqiqədə Pavol Şafranko da penaltini boşa verib. 67-ci dəqiqədə "bayquşlar"ın ispaniyalı müdafiəçisi Con İrasabal avtoqol müəllifi olub. Paytaxt klubundan yamaykalı Kahim Paris 90+6-cı dəqiqədə fərqlənərək tarazlığı bərpa edib. Oyunun əsas vaxtı 2:2 hesabı ilə yekunlaşıb.

119-cu dəqiqədə "Sabah"ın futbolçusu Tellur Mütəllimov qələbə qolunu vurub. Bununla da 3:2 hesabı ilə qalib gələn "Sabah" tarixində ilk dəfə titula sahib çıxıb. "Qarabağ" isə Azərbaycan Kubokununda finalında ilk dəfə uduzub.