“Neftçi” heyətini gücləndirmək üçün transfer çalışmalarına start verib. Legionerlərlə də danışıq aparan bakılılar öncə yerli bazarda həmlələr edir.

Prosport.Az futbolinfo.az-a istinadən xəbər verir ki, “ağ-qaralar” ilk öncə müdafiə xəttini gücləndirir. Müqaviləsi başa çatan Höccət Haqverdini düşərgədə saxlamağa qərar verən paytaxt klubu, keçmiş oyunçusunu da geri qaytarır. Belə ki, “Sumqayıt”la müqaviləsi başa çatan Elvin Bədəlov iki illik müqavilənin şərtlərini razılaşdırıb. Milli üzvü yığmanın qarşıdakı yoxlama oyunlarından sonra rəsmi imza atacaq.

2014-cü ilin yanvarından 2017-ci ilin yayınadək “Neftçi”nin düşərgəsndə olan, Elvin əsas heyətdə möhkəmlənə bilmədiyindən iş yerini dəyişmişdi. Avstriyaya yollanan mərkəz müdafiəçisi daha sonra “Sabah”da yarım mövsüm keçirmişdi. Bədəlov 6 ildir “Sumqayıt”ın şərəfini qoruyurdu.

“Neftçi”nin digər transferi İqor Ribeyrodur. “Araz-Naxçıvan”da inamlı çıxışı ilə fərqlənən braziliyalı keçidə razılaşıb. 28 yaşlı müdafiəçi Konfrans Liqasının oyunlarından sonra paytaxtda yerini dəyişəcək. Naxçıvanlılar təsnifat mərhələsinin oyunlarında onun xidmətindən istifadə edəcək, daha sonra isə “Neftçi”yə gedişə şərait yaradılacaq.

Baş məşqçi Samir Abasov keçmiş klubu “Sumqayıt”dan daha bir oyunçunu yanına gətirmək istəyir. “Kimyaçılar”la başa çatan müqaviləsini yeniləməyən Murad Xaçayev bu keçidin əleyhinə deyil. Amma hələlik onunla danışıqlar yekunlaşmayıb.