"Hamı üçün çox vacib oyundur. Ən azından final görüşləri elədir ki, bütün klubların azarkeşləri bir yerə toplanır. Bayram kimi olur. "Qarabağ" fanatları bizə azarkeşlik edəcəklər. Neytral azarkeşlər yaxşı futbola baxmağa gələcəklər. Komanda olaraq çalışacağıq ki, ən azından yaxşı oyun göstərəcək. Kubok əlavə prestijdir. Çempion olmuşuq, amma istərdik ki, finalda yaxşı oyun göstərib, müsbət nəticə qazanaq. "Sabah" yaxşı komandadır. Son vaxtlar çox iddialıdır, gələcək üçün böyük işlər görür. Çempionatda 5-ci yerdə olsa da, komanda bəlkə bu yerə layiq deyildi. Potensialına və fərdi oyunçularına görə daha yuxarıda olmağa layiq idilər. Vasili Berezutski də demişdi ki, kubokda iddialıdırlar, bura kökləniblər. Çox möhkəm kollektivə qarşı oynayacağıq. Belə komandalara qarşı belə final oyunları oynamaq xoşdur. Klub, futbolçular belə oyunlarda inkişaf edir. Hər iki komandaya uğurlar arzulayıram. Çalışacağıq ki, yaxşı oyun göstərək. Xeyirlisi olsun".
Prosport.Az xəbər verir ki, bu sözləri “Qarabağ”ın baş məşqçisi Qurban Qurbanov Azərbaycan Kubokunun “Sabah”a qarşı keçiriləcək final görüşündən öncə mətbuat konfransında deyib.
O, jurnalistlərin suallarını da cavablandırıb.
- Vasili Berezutski gələndən sonra "Sabah"ı məğlub edə bilmirsiniz. Əsasən hansı planda çətinlik çəkirsiniz?
- Bizə qarşı oyunlarda müdafiədə çox səliqəli oynayırlar. Çox diqqətli olurlar. Fərdi keyfiyyətləri yüksək olan futbolçular bizə çətinlik yaşadırlar. Bu gün ölkə çempionuyuq. Hər zaman bütün komandalar liderə qarşı daha istəkli olurlar. Özümüz də bunu keçmişik. Əvvəllər liderlərə qarşı, indi isə avrokuboklarda daha böyük komandalarla oynayanda, istər-istəməz motivasiyamız daha yuxarı olur, məsuliyyətimiz artır. "Sabah" bu mövsüm daha yaxşı yerdə olmağa layiq idi. Bizimlə çox da fərqi olmayan komandadır.
- Sumqayıtda oynamaq necə hissdir?
- Sumqayıtda meydança yaxşıdır. Orada futbola böyük maraq olur. "Sumqayıt"ın bizimlə ev oyunlarında stadion həmişə dolub. 7-8 min azarkeş görürük. Futbolçular üçün də orada oynamaq xoş olacaq.
- Penaltilərə ciddi hazırlaşmısınız?
- Çox da ciddi yox. Hər bir halda, məşqdə özləri bilmədən şərait yaradırıq ki, hər futbolçu 1-2 penalti yerinə yetirsin.