Mayın 26-da "ASK Arena"da “Fair Play Matçı” baş tutub.

Prosport.Az xəbər verir ki, oyunda peşəkar, veteran, həvəskar, qadın və əlil futbolçular və hakimlərdən ibarət qarışıq komandalar iştirak edib. Görüşün məqsədi “Futbol hamı üçün” və “Futbolda ədalətli oyun” mesajlarını vermək olub.

Bu matç, həmçinin Azərbaycan futbol tarixinin unudulmaz siması, dünya şöhrətli hakim Tofiq Bəhramovun 100 illiyi və bu il dünyada ilk dəfə qeyd edilən “Beynəlxalq Ədalətli Oyun Günü”nə həsr edilib. 

Tədbir “Azərbaycan Futbol Hakimləri” İctimai Birliyinin təşkilatçılığı, Böyük Britaniyanın Azərbaycandakı səfirliyi, AFFA ilə “Neftçi”nin dəstəyi və tərəfdaşlığı ilə keçirilib. 
Matçdan öncə tədbirin açılış hissəsində Birləşmiş Krallığın ölkəmizdəki səfiri Ferqus Auld, “Azərbaycan Futbol Hakimləri” İctimai Birliyinin sədri Gülağa Cabarov, Regional Futbol Federasiyasının prezidenti İskəndər Cavadov və digərləri açılış nitqləri ilə çıxış edib və tədbirin əhəmiyyətini vurğulayıblar. Səfir ana dilimizdə çıxış edərək idmanın vacibliyini qeyd edib: “Fair Play” matçı çox gözəl bir təşəbbüsdür. Bu matç bizə futbol və idmanın hər kəs üçün olduğunu göstərir. Hər kəs bir meydanda oynayır. Bu, futbolun insanları necə birləşdirdiyini əyani şəkildə nümayiş etdirir. Bu oyun həm də çox xüsusi bir şəxsə — Azərbaycan futbolunun siması Tofiq Bəhramova həsr olunur.”

Daha sonra qarşılaşmaya start verilib. Britaniyanın səfiri, səfirliyin əməkdaşları, “Baku Juniors” qadınlar klubu, futbol veteranları, amputant futbolçulardan ibarət millinin üzvləri və hakimlər bir araya gələrək ədalətli oyunun ruhunu qeyd edib və maraqlı futbol matçı keçiriblər. Tədbirdən sonra “Neftçi” klubunun amputant futbolçular üçün hədiyyələri təqdim edilib. 

Qeyd edək ki, bu tədbir “Azərbaycan Futbol Hakimləri” İctimai Birliyinin 2025-ci ildə həyata keçirdiyi “Tofiq Bəhramov – 100” Ədalətli Oyun İrsi” layihəsi çərçivəsində təşkil olunub.