Azərbaycan futbolunda növbəti məşqçi rəzaləti yaşandı. "Kəpəz"i Premyer Liqada saxlayan şəxs olan baş məşqçi Azər Bağırovla yollar ayrıldı.
Oxşar hadisə ötən mövsüm bitdikdən sonra "Turan Tovuz"da da baş vermişdi. Klub rəhbərliyi dəyişikliyi birinci baş məşqçi Ayxan Abbasovdan başlamağı lüzum bilmişdi. Hazırda komandanı avrokuboklara daşıyan Elmar Baxşıyev də "Araz-Naxçıvan"da bu təhlükənin astanasındadır.
Bəs Gəncə klubunda nə baş verib? Axı, "Kəpəz"in İdarə Heyətinin yeni sədri Namiq Qədirov yarım ay əvvəl "Report"a müsahibəsində "Azər Bağırova dəfələrlə dəstəyimizi bildirmişik. Mövsümün sonunda baş məşqçi ilə görüş keçiriləcək. Bizim fikrimizi soruşursuzsa, əməkdaşlığımızı davam etdirmək niyyətindəyik" fikirlərini çatdırmışdı.
Prosport.Az təfərrüatları təqdim edir.
Məsələ burasındadır ki, Azər Bağırovla "Kəpəz"in İdarə Heyəti sədrinin idman məsələləri üzrə müşaviri Erkin İbrahimov arasında görüş keçirilib. Ona klubun büdcəsində ciddi dəyişiklik olmayacağı bildirilib. Bağırov isə komandada yeni sponsor gəlişindən sonra da heç bir dəyişiklik olmayacağını görüb getmək istədiyini qeyd edib. Söhbət burada daha çox şəxsi müqavilədən gedir. Üstəlik, Azər Bağırov tezliklə kiçik bir uğursuzluq halında mövsümün əvvəlində klub rəhbərliyinin onu yola salmaq planı cızdığını hiss edib.
Yəni, plan elə qurulub ki, Azər Bağırova üzüsulu getmək daha məqbul variant olub. İstənilən halda, orada özünə hörmət qoyan məşqçi qalmaq istəməzdi. Halbuki hamı yaxşı bilir ki, "Kəpəz" neçə müddətdir ki, baş məşqçi postuna əcnəbi mütəxəssis gətirmək istəyir. Ən çox adı çəkilən şəxs isə Mirça Rednikdir.
Bəli, "Kəpəz"in yeni sponsoru "Turan Tovuz" rəhbərliyi kimi yeni mövsümdə səxavətli olmayacaq. Ancaq Azər Bağırovu razı sala bilməyəcək qədər də xəsis deyil. "Kəpəz" klubunun yeni baş məşqçi təyinatı isə kimin gəlməsindən asılı olmayaraq, azarkeşlər tərəfindən təzyiqlə qarşılaşacaq.
"Kəpəz"də oxşar presedent əvvəllər də olub. Tərlan Əhmədov "Kəpəz"i Premyer Liqada saxlasa da, klubdan göndərilib. İndi Azər Bağırov bunu bacarsa da, klubdan getməyə məcbur edilib.