"Neftçi"nin baş məşqçisi Samir Abasov Misli Premyer Liqasının XXXV turunun "Səbail"lə oyunundan (3:0) sonra keçirilmiş mətbuat konfransında iştirak edib.

Prosport.Az xəbər verir ki, o, jurnalistlərin suallarını da cavablandırıb.

- "Səbail"ə qarşı evdəki hər iki oyunda yaxşı oynadınız. Digər matçlarda da bu cür yaxşı çıxış etməməyinizə səbəb oldu?

- O vaxtı yeni gəlmişdik, futbolçularda əhval-ruhiyyə fərqli idi. İndi də çox rahatçılıq var idi. Bunun fonunda da çox şey alındı. Elə matçlar var idi ki, bundan da yaxşı oyunlar göstərmişdik. Elə son matçlara baxsaq, “Turan Tovuz”la oyunu xatırlayıram. Nə çatmadı? Elə həmin şeylər çatmırdı ki, istədiyimizdən xeyli uzaq qaldıq. Bunlar bizi düşünməyə məcbur edir. Bu çatışmazlıqlar üzərində işləyirik. Yeni mövsümdə başqa komanda olmağa məcburuq.

- Düşünmürsünüz ki, kubokda final oynamaq üçün çempionatı qurban verdiniz?

- Biz kubok və çempionatı bölməmişdik. Anlayırıq ki, hansı klubdayıq, hər bir oyunun məsuliyyəti var. Əlimizdə sırf kuboku tutub, çempionata başqa motivasiya ilə çıxmırdıq. Vallah yox idi. Sadəcə şanssızlıq oldu. Sonda şansımız kubokda idi. Ona başqa cür hazırlaşdıq. Futbolçular da onu çıxış yolu kimi görmüşdülər. “Sabah”la görüşə də yaxşı başladıq, epizodları dəyərləndirsəydik, finalda biz oynayardıq. Kubok və çempionatda ayrıseçlik etmədik, bundan sonra da etməyəcəyik.