Misli Premyer Liqasının XXXV turunun “Şamaxı” – “Araz-Naxçıvan” oyunundan (0:1) sonra qonaq komandanın baş məşqçisi Elmar Baxşıyev jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– Ağır oyun alındı. Bilirdik ki, bizi nə gözləyir. Ümumi götürəndə mövsüm ərzində istədiyim oyunu və nəticəni gördüm. Naxçıvan adına sevindiricidir. Rəhbərliyi təbrik edirəm. Bizə inandılar. Komanda olaraq daha yaxşı ola bilərik. Konfrans Liqası haqda nəsə danışsam, tez olacaq. Gələcəklə bağlı qarşıdakı günlərdə görüş olacaq, planlar müzakirə olunacaq.
– Konfrans Liqasında azı bir mərhələ keçmək üçün neçə transfer istəyəcəksiniz?
– Rəhbərliklə görüşdə də bizi daha çox komandanın inkişafı maraqlandırırdı. Nəticə istəyirlər, amma daha çox komanda olaraq buna can atırdıq. Nəsə deyə bilmərəm. Hər şey ola bilər. Bəlkə mənim işim qane etməyə bilər. Buna da hazır olmalıyıq. Daha yaxşı, iddialı komanda formalaşdırmaq fikrimiz var.
– Naxçıvan futbolu tarixində ilkə imza atdınlz. Bu qələbəni Naxçıvanda qeyd etmək fikriniz var?
– Mənlik olsa, bu dəqiqə komandanı Naxçıvana apararam. Mənə aid sual deyil. Məsələ rəhbərlik səviyyəsində həll olunmalıdır. Öz şəhərimizdə oynasaq, daha çox üstünlük qazana bilərik. Növbəti mövsüm Naxçıvanda oynamağa ümid edirik.
– Heyətlə bağlı planlar nədir?
– Mən qarışıq hamının müqaviləsi bitir. Yalnız Ribeyronun müqaviləsi var. Əsas komandanı saxlamaq və əlavə oyunçularla gücləndirmək lazımdır. İstədiyim layihəni qəbul etsələr, davam edərik.
– Bu medal məşqçi karyeranızda hansı yeri tutur?
– Daha əvvəl “Qəbələ”də də yaxşı və pis nəticələrimiz olub. İnam olan yerdə məşqçi də iddiasını qoruya bilər.
– Məyusluq var ki, potensialınıza görə ikinci ola bilərdiniz?
– Xeyr. Mövsüm ərzində heyətlə bağlı çətinliklər yaşadıq. Daha güclü olmaq üçün heyət geniş olmalıdır.
– Mövsüm ərzində çox çətinlik oldu, amma 3-cü yeri tutdunuz. Futbolçuları buna necə inandırdınız?
– Uğurda daha çox pay sahibi futbolçulardır. Yaxşı xarakterə sahib kollektiv formalaşdırdıq. Onlar çətinliyə dözməyi bacarırdı. Komanda yığmaq asandır, amma eyni fikirli insanları cəmləmək çətin olur.
– “Qəbələ” yenidən elitaya qayıtdı. Fikirləriniz nədir?
– Onların yeri Premyer Liqadır. Təbriklərimi çatdırmışam.