"Qəbələ" klubunun SAB şirkəti ilə bağladığı əməkdaşlıq müqaviləsini detalları açıqlanıb.

Prosport.Az xəbər verir ki, bu barədə Qəbələ təmsilçisinin prezidenti Fariz Nəcəfov mətbuat konfransında danışıb.

O, klubun SAB şirkətindən reklam qarşılığında maliyyə vəsaiti almayacağını söyləyib: "Şirkət komandanı qida məhsulları ilə təmin edəcək. Biz isə komanda formalarının qol hissəsində SAB-ın loqosunu və Qəbələ şəhər stadionunda şirkətin bannerlərini nümayiş etdirəcəyik".

"Zəhmət-Ruzi" MMC-nin baş icraçı direktoru Elnur Bədəlov isə gələcəkdə əməkdaşlığın daha da genişləndirilməsini istisna etməyib: "Builki əməkdaşlıq uğurlu alınsa, növbəti illərdə müqavilənin müddəti artırıla bilər. 1 illik müqavilə bir növ eksperimentdir. "Qəbələ"nin Akademiyasının olması bizim diqqətimizi çəkdi və biz bu klubla əməkdaşlıq etmək qərarına gəldik. Növbəti mövsüm üçün əməkdaşlıq edəriksə, Qəbələ şəhər stadionuna şirkətin adının verilməsi məsələsinə baxıla bilər. Hazırkı müqavilədə bu nəzərdə tutulmayıb".