“Zirə” yeni mövsüm üçün ilk transferini reallaşdırıb. Qəsəbə təmsilçisi “Şamaxı” ilə müqaviləsi mayın sonunda başa çatacaq Brahim Konate ilə anlaşma əldə edib.

Prosport.Az futbolinfo.az-a istinadən xəbər verir ki, həm avrokubokda, həm də yeni çempionatda iddialı olmaq istəyən qəsəbə təmsilçisi bölgə klubunda yaxşı oyunu lə seçilən yarımmüdafiəçi ilə 2 illik müqavilə bağlamağa razılaşıb. Bütün detallarda ortaq məxrəcə gəlinib. Tərəflər yay fasiləsi başlayan kimi münasibətləri rəsmiləşdirəcək.

Kiprdən də təklifi olan Mali əsilli fransalının “Şamaxı”da qalmayacağı çoxdan bəlli idi. Dəyəri artan 29 yaşlı yarımmüdafiəçinin istədiyi maaşı ödəmək bölgə klubu üçün çətin olacaqdı. Bu səbəbdən klub ona istədiyi yerə getmək üçün icazə vermişdi.

Konateni Azərbaycandan da istəyənlər var idi. “Turan Tovuz”un təklifnə isti yanaşmayan yarımmüdafiəçi, aylıq 15 min dollar maaş vəd edən “Neftçi”ylə müzakirələr aparırdı. Lakin “Şamaxı”da aldığının üç misli də Brahimi qane etməyib. Yekunda daha sərfəli təklif irəli sürən, məbləği bir qədər də artıran “Zirə” istəyinə çatıb.

Konatenin gəlişi “Zirə”nin iki yarımmüdafiəçisinin gedişi ilə əlamətdar olacaq. “Qartallar” son iki mövsümdə komandanın şərəfini qoruyan 27 yaşlı Pyer Zebli ilə bitən müqavilənin müddətini uzatmayacaq. Eldar Quliyevin də qəsəbə təmsilçisini tərk etmək ehtimalı var.