"Çətin oyun olacağını bilirdik. Gözlədiyimiz qədər gərgin qarşılaşma izlədik. Havanın çox isti olması hər iki komandaya əlavə çətinlik yaratdı".

Prosport.Az xəbər verir ki, bunu "Mingəçevir" komandasının baş məşqçisi Fizuli Məmmədov XXV turda "İmişli" ilə qolsuz başa çatan matç barədə deyib.

O, "Mingəçevir"in I Liqada sonuncu olmaması üçün lazım olan 1 xalı qazandıran matç barədə daha sonra bu fikirləri bildirib: "İmişli" Premyer Liqaya vəsiqəni təmin etmiş komandadır. Güclü heyətləri var. Bizə qarşı mübarizə aparan futbolçuların 60-70%-i gələn mövsüm elitada oynayacaq. Buna baxmayaraq, məqsədimiz oyundan öncə də dediyim kimi, qələbə idi. "İmişli"ni səfərdə məğlub edə (1:0) bilmişdik. Onlara qarşı oyunumuz maraqlı və çox gərgin alınmışdı. Komandamın yaxşı formada olması 2-ci görüşdə də qələbə barədə düşünməyə əsas verirdi.

Matça taktiki planda yaxşı hazırlaşmışdıq. Həftə ərzində rəqibin güclü və zəif cəhətlərini müəyyənləşdirmişdik.

Qarşılaşma ərzində rəqibi adətən taktiki cəhətdən üstələməyə çalışırdıq və əksər hallarda buna nail olurduq. Düzdür, "İmişli"nin qol epizodları da oldu. Onların futbolçuları fərdi keyfiyyətləri hesabına bir neçə epizodda bizə çətin anlar yaşatdı. İlk hissədə bizim də qol imkanımız oldu. Onların epizodunda qapıçımız uğurlu çıxışla diqqət çəkdisə, Gülağa Əsədovun uzaq küncə endirdiyi zərbədə də bir qədər dəqiqlik çatmadı.

2-ci hissədə də hər iki tərəfin fərqlənmək imkanları var idi. Rəqibin qol vurmasını müdafiəçimiz Vüqar Həsənovun kritik müdaxiləsi əngəllədi. Sona yaxın isə qapı dirəyi onları qoldan xilas etdi. O zərbə qola çevrilsəydi, "İmişli"ni öz meydanımızda da məğlub edəcəkdik. İstənilən halda, 1 xal da bizim üçün çox dəyərlidir. Bu xal sayəsində liqada qalacağımız dəqiqləşdi.

Komandama və bizi 90 dəqiqə dəstəkləyən azarkeşlərimizə təşəkkür edirəm".