Azərbaycan kikboksinq millisinin baş məşqçisi Elşən Abdulrəhimovun Prosport.Az saytına müsahibəsi

– Avropa Oyunlarında 3-cü qızıl medalı kikboksinq qazandırdı. Əvvəldən əslində Fərid Ağamoğlanovun qızıl medal qazanacağı gözlənilirdi və bu reallığa çevrildi...
– Bu, kikboksinq ailəsinin, Kikboksinq Federasiyasının böyük uğurudur. İllərlə görülən işlərin, illərlə, çəkilən əziyyətlərin, federasiya rəhbərliyinin, məşqçilər korpusunun gördüyü işin nəticəsidir. Bütün federasiya rəhbərliyini, bütün məşqçilər korpusunu, başda Adil Əliyev olmaqla Orxan Əliyevi, Ramal Aslanovu, Eduard Məmmədovu bu uğur münasibətilə təbrik edirəm.

– İlk dəfə kikboksinq Avropa Oyunlarına düşdü və ilk dəfəsində qızıl medal qazanıldı. Əslində bu tarixi nailiyyətdir...
– Bilirsiniz ki, full kontaktda bu yarışda idmançılarımız təmsil olundu. Full kontaktda da federasiyanın perspektivi çoxdur. İdmançılarımızın imkanları genişdir. Belə söhbətlər gəzir ki, full kontakt kikboksinqdə Olimpiya növü kimi qəbul olunacaq.

– Avropa Oyunlarında çıxış etmiş 2-ci kikboksçumuz Elşad Şahbazov barədə fikirlərinizi almaq istərdik. Qalib gəlmək üçün nə çatmadı?
– Elşad bizim prespektivli kikboksçumuzdur, ümumi komandanın üzvüdür. Daim yarışlarda diqqət mərkəzində olur. O da şəxsi məşqçisi Fuad Zeynalovun rəhbərliyi altında yaxşı inkişaf edib. Bu yarışda nedal qazanmamasının səbəbi Elşadın full kontaktda öz çəkisində döyüşməməsi ilə bağlı idi. Ancaq yenə də mənim şəxsən bir mütəxəssis kimi döyüşü çox xoşuma gəldi. Uduzsa da layiqli döyüş göstərdi.

– Oktyabrda Səudiyyə Ərəbistanında Ümumdünya Kombat Oyunları keçiriləcək. Orada da bizim bir kikboksçumuz olacaq. Eduard Məmmədovun digər tələbəsi Amin Quliyevdən orda nə gözləyə bilərik?
– Amin hələ uşaq ikən demişdim ki, o kikboksinqin yeni şahzadəsidir. Biz Amindən də qələbə gözləyirik. Mən birinci gün hələ müsahibə alınarkən qeyd etmişdim ki, biz qızıl üçün gəlmişik. Gənc olaraq Amin üçün həmin yarış bir məktəb olacaq.