Misli Premyer Liqasının XXXIII turunun “Neftçi” – “Kəpəz” oyunundan (2:2) sonra meydan sahibi komandanın baş məşqçisi Samir Abasov jurnalistlərin suallarını cavablandırıb.

Prosport.Az xəbər verir ki, mütəxəssis oyunsonrası bunları deyib.

– Oyunçu 5 metrdən qapıya düşə bilmir… Futbolçuların səhvləri sıralanır. Belə olanda yuxu rejiminiz pozulmur? Və ya səhhətinizdə durum necədir?
– Sakit qalmağa çalışırıq. Reallıq budur ki, bizim üçün bu mövsümün qatarı gedib. Sakit qalmağa çalışırıq. Bilirəm ki, mən danışandan sonra vallar fərqli yerə gedə bilər. Ona görə sakit olmağa çalışırıq. Bacardığımız qədər uşaqları oyuna hazırlaşmağa, oynamağa çalışır. Birinci səhvlər deyil. Təsəvvür edin, bu gün ilk hissə nadir hallarda belə dominant oynayan komanda olar. Otura-otura saydım ki, ilk hissədə 10-15 dəfə rəqib cərimə meydançasının yaxınlığında, içində olmuşuq. Hətta Yuri Matias, Azər Salahlı kimi müdafiəçilər də irəlidə idi. Bu qədər epizodda qol vura bilməmək problemləri göstərir. 1 "uzun" topla rəqib gəlib qol vurur. Bu məsələləri də bilirik. 3 oyunumuz qalıb. Yenə də futbolçuları kökləməyə çalışacağıq. Artıq adımıza layiq bir şey etmirik. 2 oyundur ki, uduza-uduza hesabı bərabərləşdiririk. Oyunun içində bəzi futbolçular çox çalışır. Məsələn, Bassala Sambu… Bir neçə də oyunçu var ki, onlar uduzmamaq üçün çox çalışır.

– Növbəti mövsümdə sizə böyük büdcə veriləcəyini düşünmək olar?
– Bilmədiyim şey haqda sual verirsiniz. Mən gələndə müəyyən komanda yığılmışdı və əlimizdə müəyyən oyunçular var idi. Sonda oturub danışacağıq və gördüyümüz işin hesabatını verəcəyik. Büdcə ilə bağlı nəsə bilmirəm.

– Emin Mahmudov komandada qalacaq?
– Eminin müqaviləsi var. Mövsüm bitəndən sonra bizim də qərarlarımız var. O demək deyil ki, müqaviləsi olan hökmən burda qalmalıdır. Çalışacağıq ki, bəzi məsələləri yoluna qoyaq. Futbolçularla fikirlərimizin üst-üstə düşəcəyinə ümid edirəm. Hər iki tərəf üçün xeyirli olmasını istəyirik.

– Futbol ictimaiyyəti sarğısı olmasa da, Emini kapitan kimi qəbul edir. Nə üçün ona sarğını verə bilmədiniz?
– Bilmədiniz deyəndə ki, sanki kimsə nəsə məcbur edib. Siz sual verdiyiniz adamı tanısanız, bu sualı verməzsiniz. Mən bura gələndə Emin Mahmudovun, Ramil Şeydayevin məsələsi çox danışılırdı. Oyunçuları sakitləşdirməyə, kapitan məsələsini bitirmək üçün kapitanlığı Rza Cəfərova verdim. Emin bu mövsüm çox əziyyət çəkir. Qışdan sonra stabil oynaya bilmir, mütəmadi zədələri olur. Bunlar daim gördüyümüz Emini görməməyə səbəb oldu.

– “Sumqayıt”la oyunda sayılmayan qolunuz, verilməyən penaltiniz var idi. Bu gün də rahatlıqla Elvin Camalova “qırmızı” verildi. Sizcə, iddiasız “Neftçi”ni qəbul etmirlər?
– Səbəblər var. Qərəzdən nəsə olduğunu dilə gətirmirəm. Verilən qərarlar nə dərəcə düzgün olmasa da, reallığı görməliyik. Bunun əziyyətini görmüşəm. Sambu qırmızı vərəqəyə görə Kubokda olmadı və əziyyətini gördük. Düzdür, oyundan sonra VAR-da oturan hakim dedi ki, ikiayaqlı müdaxilə idi və “qırmızı” var idi. Oyundan sonra təkrar baxdım, sanki 2 ayağa müdaxilə yox idi. “Neftçi” haqda çox danışılır. Bu, gündəmdə olmaq deməkdir. Nəticələrimiz də buna səbəbdir, haqq qazandırıram. İstəmədiyim şey odur ki, bizim düşdüyümüz situasiya kiməsə rahatlıq verməsin. Bunun sonu yaxşı bitməyəcək. Təhdid kimi başa düşülməsin. Bir gün lazım olan insanlar masaya əlini vuracaq və ondan sonra necə olacaq, Allah sizi qorusun. Heç kimin “Neftçi”ni əzməyə səbəbi yoxdur. Ancaq neqativ danışılır və reaksiya göstərmiriksə, səbəb var. Futbolda başımız aşağıdır. 2 ildir ki, avrokuboklara gedə bilmirik. Hakimlərlə bağlı çox məsələ olsa da, 1-2 dəfə danışmışam. Amma bu kiməsə səbəb vermir ki, “Neftçi”ni əlində vasitə etsin. Bəlkə, kimlərəsə xoş gəlmək, simpatiya qazanmaq istənilir. Belə davam etməyəcək. Nə varsa, onu edək. “Neftçi” də bir gün özünə gələcək. Belə şeylər xoş deyil. Azından Azərbaycan komandasıyıq. Son illərdə nəticələr həddindən artıq pisdir. Lakin Azərbaycan futbolu deyilirsə, ilk sırada “Neftçi” gəlir.

– Yəqin, “Neftçi”nin gələcəyi üçün planlarınız var. Fikirləriniz, planlarınız rəhbərliyin düşündükləri ilə üst-üstə düşəcək?
– Proqramımız var. Əmin olun ki, rəhbərliklə fikirlərimiz üst-üstə düşür. Biz onları, onlar bizi anlayır. Hamının bildiyi problemlər var. Burda çempion olan, gümüş medal qazandığımız illərdə də tənqidlər var idi və bunları normal qarşılayıram. Azarkeşlərin, medianın belə situasiyada komandaya dəstək verməsi, situasiyanı anlaması xoşdur. Bu situasiyada bizi anlamağa çalışan hər insana minnətdaram.

– Ad çəkməyə ehtiyac yoxdur. Sərəncamınızda olan futbolçuları torbaya qoyub, çölə atsanız, ordan “Neftçi” adına layiq neçə oyunçu çıxar?
– İnşallah, çox çıxar…