Təbrizin “Traktor” komandası İran Pro Liqasında ilk dəfə çempion olub.

Prosport.Az xəbər verir ki, “qızıl qurdlar” XXVIII turun matçında Qəzvinin “Şəms Azər” komandasını 4:0 hesabı ilə məğlub edib.

Oyun Qəzvindəki “Sərdar Azadeqan” stadionunda keçirilib. Artıq ilk dəqiqədə xorvatiyalı hücumçu Domaqoy Drojcek hesabı açıb. 8-ci dəqiqədə Əmirhüseyn Hüseynzadə üstünlüyü ikiqat artırıb, 30-cu dəqiqədə isə Drojcek dubl edərək fasiləyə qədər hesabı 3:0-a çatdırıb.

2-ci hissədə “Şəms Azər”in müdafiəçisi Homən Rəbizadənin meydandan qovulmasından sonra “Traktor” penalti vurmaq hüququ qazanıb. 11 metrlik cərimə zərbəsini yerinə yetirən portuqaliyalı Rikardu Alveş topu tora göndərərk oyunda yekun hesabı müəyyənləşdirib – 4:0.

“Traktor” qələbə sayəsində mövsümün bitməsinə 2 tur qalmış çempionluğu təmin edib. Tribunalarda yerli iqtidar nümayəndələri və digər rəsmi şəxslər Təbriz komandasının tarixi qələbəsini izləyib.

Qeyd edək ki, 28 turdan sonra Təbriz təmsilçisi 64 xal toplayıb. Onun ən yaxın təqibçisi "Sepahan"ın 56 xalı var. Beləliklə, "qızıl qurdlar" 30 turdan ibarət çempionatın vaxtından əvvəl qalibi olub.