Azərbaycan Premyer Liqasında çempionluğu təmin edən “Qarabağ” yayda heyətində bir sıra dəyişikliklər etməyi planlaşdırır.

Prosport.Az futbolinfo.az-a istinadən xəbər verir ki, hücumçu Redon Cica son açıqlamasında müqaviləsinin müddəti bitənədək komandada qalmaq istədiyini açıqlasa da, məşqçilər korpusu fərqli düşünür.

Məsələ burasındadır ki, Ağdam klubunun baş məşqçisi Qurban Qurbanov daha güclü hücumçu axtarışındadır. Təcrübəli mütəxəssis ön xəttə istədiyi oyunçuları cəlb edə bilsə, o zaman albaniyalı forvarda ehtiyac qalmayacaq.

Doğrudur, Cica ilə maraqlanan Albaniya klubları var. Lakin onların təklif etdiyi məbləğ 26 yaşlı futbolçunun “Qarabağ”dakı məvacibinin yanına belə yaxınlaşa bilmir. Bu da Albaniya millisinin üzvünü qane etmir. O, başqa heç bir klubda Azərbaycan çempionundakı qədər qazanmayacağını başa düşür. Bu səbəbdən daha 1 il komandada qalmaq niyyətindədir.

Qeyd edək ki, Redon Cicanın “Qarabağ”la müqavilə müddəti 2026-cı ilin yayına qədərdir.