Heyətdəki qapıçıların heç birindən tam razı olmayan “Qarabağ”ın baş məşqçisi Qurban Qurbanov axtarışa çıxıb. Təcrübəli çalışdırıcı klub rəhbərliyindən yeni qolkiperin alınmasını istəyib.

Prosport.Az futbolinfo.az saytına istinadən xəbər verir ki, əsas qapıçı Mateus Koxalskiyə rəqabət yaradacaq birinə ehtiyac duyulur. Bunu bacarmayan Fabian Buntiçin mövsüm başa çatan kimi yola salınacağı dəqiqdir. Şahruddin Məhəmmədəliyev də zaman-zaman tam etibar ediləsi qapıçı olmadığını göstərib. Bu səbəbdən ağdamlılar daha səviyyəli legioner arayışındadır.

Əldə etdiyimiz dəqiq məlumata görə, “Qarabağ” sabiq qapıçısı İbrahim Şehiçi geri qaytarmaq istəyir. Artıq 36 yaşlı əlcək sahibinə ilk təklif göndərilib. Səudiyyə Ərəbistanının “Əl Xalej” klubunda çıxış edən bosniya və herseqovinalı “çərçivə” qoruyucusu da bu təklifə isti yanaşır.

Hazırda dəvətin rəsmi müraciətə çevrilməsi üçün vəziyyət araşdırılır. 2 il öncə “Konyaspor”dan ərəb klubuna yollanan Şehiçin sərbəst qalması üçün nə qədər maliyyə lazım olduğu, futbolçunun özünün hansı maaşa razılaşacağı müzakirə edilir. Anlaşma əldə olunsa, İbrahim 2 illik müqavilə ilə 2013-18-ci illərdə çıxış etdiyi “Qarabağ”a gələcək.