Millimizin futbolçusu Mahir Emreli cari mövsüm Almaniya 2-ci Bundesliqasında 7-ci qolunu vurub.

Prosport.Az xəbər verir ki, onun çıxış etdiyi "Nürnberq" XXXI turd "Fortuna" (Düseldorf) klubunun qonağı olub.

Qonaqlar 3:0 öndə olsa da, meydan sahibləri sonda hesabı bərabərləşdirib – 3:3. Mahir Emreli oyuna start heyətində başlayıb və 45+4-cü dəqiqədə komandasının 2-ci qolunu vurub. Ona məhsuldar ötürməni Kaspar Yanda verib. Mahir 87-ci dəqiqədə Yani Sera ilə əvəzlənib.

Qeyd edək ki, Mahir Emreli artıq ardıcıl 3-cü matçda 4-cü dəfə fərqlənir.

Hazırkı vəziyyətə görə, "Nürnberq" 45 xalla turnir cədvəlində 8-ci pillədə qərarlaşıb və sona 3 tur qalmış komandanın Bundesliqaya çıxmaq şansı qalmaqdadır.