Azərbaycan Kubokunun yarımfinal mərhələsində Sabah” və “Neftçi” arasında keçirilmiş cavab oyunundan (1:1) sonra qonaq komandanın baş məşqçisi Samir Abasov jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.
– Azarkeşlərimizə təşəkkür edirəm. Onların dəstəyini hiss edirdik. Kubokun bütün məsuliyyəti mənimdir. Fanatlardan üzr istəyirik. Çətin dönəmdə gəldik və qış fasiləsindən yaxşı yararlana bilmədik. İstədiyimiz transferləri edə bilmədik. Baş məşqçi olaraq düşünürəm ki, Kuboka görə məsuliyyət məndədir. Üzr istəyirik.
– 70-80% oyunçuların “Neftçi”də olması adamı heyrətləndirir. Sabiq idman direktoru Yens Andeşonu görsəniz, ona nəsə demək istərdiniz?
– Heç bir insan haqda danışmaq istəmirəm. Bu gün həddindən artıq üzüldüyüm məqamlar var. Oyuna yaxşı köklənmişdik. İlk hissədə bəlkə də ən yaxşı oyunumuzu göstərdik. 100%-lik epizodları dəyərləndirə bilmədik. Buraxdığımız qol da öz səhvimizdən oldu. Oyuna qolla başlasaydıq, bəlkə fərqli olardı. Uşaqlar ilk hissədə çox yaxşı işlər gördü. Əfsuslar olsun, sona qədər davam etdirə bilmədik. Rəqibin heyətində fərdi bacarıqları olan oyunçular çoxdur. Onlar bu komponentdə bizdən üstün oldu. Əvəzetmələrdən sonra daha üstün oldular. Oyunçular paltardəyişmə otağına gələndə artıq şikayətlənməyə başladı. Emin Mahmudov meydanda lider kimi idi, amma o da yoruldu. Çox futbolçu əvəzlənməyi istəyirdi. Əvəzetmələrimiz fayda vermədi. Rəqib hücumameyilli oyunçuları meydana buraxanda fərq yaratdı. Planlar cızırıq. Rəhbərlik və biz tərəfdən də qərarlar veriləcək. Yeni mövsümə daha yaxşı başlamaq istəyirik. “Neftçi”yə layiq oyunçular gətirməliyik.
– “Neftçi” – “Kəpəz” oyununda hücumçunuz Bassalu Sambu qırmızı vərəqə almasaydı, indi fərqli olardı?
– Bu haqda danışmaq olmur. Sambu qollar vururdu və bizi ümidləndirmişdi. Cəzasının azaldılmasını istədik, amma etmədilər. Sambu burada yoxdursa, nə üçün digər hücumçular onun kimi oynamır? Azından Dembo Darbo, Ramil Şeydayev, gənc Ağadadaş Salyanski var. Nə olacağını bilmirəm.
– “Qarabağ”la oyunda Darbo, Aleks Fernandes əsas heyətdə idi. Ancaq bu gün onlar ehtiyatda qaldı. Bu nədən irəli gəlirdi?
– Dəyişən nəsə yoxdur. Ağadadaş “Qarabağ”la oyunda zədəli idi. Darbo qış toplanışını bizlə keçmədi, sonra bərpa müddəti keçdi.
– Əvəzetmələri gec etdiyinizi düşünmürsünüz?
– Heyətdə olan oyunçuların matçın əvvəlindəki tempi sona qədər davam etdirməməsi fiziki durumla bağlıdır. Onlar belə davam etsəydi, dəyişikliyə lüzum olmazdı. Hər şey istədiyimiz kimi olmur. Emin Mahmudov sonda 2-3 epizodda top itirdi. Bu, yorğunluqdan irəli gəlirdi. Mustafa Sek, Andrey Ştoqrin əvəzlənmək istədi. Sonradan oyuna girənlər də effekt vermədi.
– “Neftçi” bu gün sanki qocalar evinə bənzəyir. Məsuliyyəti üzərinizə götürməyiniz futbolçuları qorumaqla bağlıdır?
– Oyunçuları mən gətirməmişəm. Ancaq azarkeşlər mənə ümid edirdi, bacarmadım. Buna görə üzr istəyirəm.
– Növbəti mövsüm komanda neçə faiz dəyişməlidi?
– Hər məşqçinin öz üslubuna görə oyunçuları olur. Konkret oyunçu götürəndə nələrə üstünlük verəcəyimiz şeylər var. Neçə faiz gedəcək, neçə faiz gələcək, özünüz götür-qoy edərsiniz. Dəyişikliklər lazımdır.
– Əksər legionerlərin müqavilə müddəti və maaşı yüksəkdir. Bu, problem ola bilər?
– Buna cavab vermək çətindir. Ətraflı hər şeyi danışırıq. Klub, komanda üçün ən yaxşısını etməyə çalışacağıq. Ümid edirəm ki, problemləri çözə biləcəyik. Nəinki biz, digər komandalar da oyunçularla bağlı problem yaşayıb. Zaman necə olacağını göstərəcək.