Misli Premyer Liqasının XXXI turunda “Qarabağ”a məğlub olan “Neftçi” (0:3) medalçılar sırasına düşmək şansını itirib.

Prosport.Az xəbər verir ki, hazırda 6-cı pillədə qərarlaşan “ağ-qaralar”ın sona 5 tur qalmış ilk “üçlüy”ə düşə bilməyəcəyi dəqiqləşib.

Aktivində 35 xal olan Samir Abasovun yetirmələri üçüncü sıradakı “Araz-Naxçıvan”dan düz 18 xal geri qalır. Bu isə o deməkdir ki, mövsümün qalan hissəsində naxıçvanlılar məğlubiyyəti, bakılılar isə qalibiyyəti sıralasa, “Neftçi” ən yaxşı halda rəqibindən 3 xal geri qalacaq.

Ardıcıl ikinci mövsümdür medalçılar sırasından kənarda qalan Bakı klubunu dördüncü pillədəki “Turan Tovuz”la da 13 xal ayırır. Yəni “Neftçi” dördüncülük üçün qalan cüzi şansını artıq növbəti turda itirə bilər. Bir sözlə, paytaxt klubunun avrokuboklara vəsiqə üçün yeganə şansı Azərbaycan Kubokunu qazanmaqdır. Komandanın yarımfinalın evdəki ilk matçlnda “Sabah”a məğlub olduğunu (1:2) nəzərə alsaq, bu ehtimalın da çox aşağı olduğunu görərik.

Qeyd edək ki, “Neftçi”nin ölkə kubokunda “Sabah”la cavab matçı aprelin 23-də keçiriləcək.