Misli Premyer Liqasının XXXI turunun “Şamaxı” – “Kəpəz” oyunundan (2:1) sonra meydan sahibi komandanın baş məşqçisi Ayxan Abbasov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Stresli, maraqlı, sürətli oyun oldu. Azarkeşlər möhtəşəm atmosfer yaratmışdı. Qələbə qazanmaq istəyirdik. Evdə sevinc başqa olur. İstədiyimiz qələbəni qazandıq. Rəqib yaxşı mübarizə apardı. İki komandanın da şansları var idi. Qarşıdakı oyunları böyük motivasiya ilə oynamalıyıq. Yuxarı sıralara qalxa bilərik. Gənclərimizin inkişafı üçün oyunlar vacibdir. Bu il istəyimizə çatacağımıza inanırdıq. Gələn mövsüm daha yaxşı olmaq üçün belə matçlar lazımdır.

– Bir hücumçunuz qalıb...
– Bir hücumçu ilə çətindir. Taktiki dəyişikliklər edə bilərik. Qarşıda çətin Tovuz səfəri var. Brahim və Mayklın sarı vərəqəsi var idi. Mayklı əvəzləmək istəyirdik, alınmadı.

– Digər komandalarda olan gəncləri heyətinizə qatmaq üçün danışıqlara başlamısınız?
– Bəli.

– Tovuz səfərində nəyə ümid edirsiniz?
– “Turan Tovuz”un motivasiyası var. 3-cü sıraya yüksəlmək istəyirlər. Aramızdakı 3 oyunda da pis oynamamışıq. Yeni komanda olduğumuz üçün bəzi matçlarda yaxşı oynasaq da, qələbə qazana bilmirdik. Bizimçün hər oyun çətindir, Tovuz səfəri daha çətin.

– Kimlərlə yola davam edəcəksiniz?
– Danışıqlarımız davam edir.

– Mikelsin qalmaq ehtimalı var?
– Oyunçuların təklifləri var. Ən az büdcə bizdədir. Bizdən başqa digər komandaların dəstəyi var. Planlarımız var, büdcəni gözləyirik. Gənc futbolçularla danışırıq.

– “İmişli” – “Qəbələ” oyununu stadiondan izlədiniz. Təəssüratlarınız necədir?
– Çox oyunlara gedirəm. I Liqanın vacib oyunu idi. “İmişli” daha istəkli idi. “Qəbələ”də gənclər var, onları iş başında görmək istəyirəm. Yaya qədər seleksiyamız var. Hər kəsi izləyəcəm. Həm də gələcək rəqiblərimizdir.

– Sponsorunuz olsaydı, avrokuboklara iddialı “Şamaxı” yarada bilərdiniz?
– Sponsorun fikri önəmlidir. Ayxan Abbasovdan olsa, edər.