"Turan Tovuz"un kapitanı Şəhriyar Əliyev komandasının oyunu olan zaman azarkeşlik etdiyi "Qalatasaray"ın matçını izləmək üçün Türkiyəyə getməsinə aydınlıq gətirib.

Təcrübəli müdafiəçi Prosport.Az-ın redaksiyası ilə əlaqə saxlayaraq bunları söyləyib:

"Oynadığım kulublarda çalışmışam ki, qazandığım pulun haqqını verim. Yeri gələndə oyuna zədəli çıxmışam. Amma bunu heç kim bilməyib. Hər zaman hər mənada komandamın yanında olmuşam və dəstəkləmişəm. Yeri gələndə zədəli olanda belə, komandamın yanına gedə bilməmişəm, ayağım gipsdə olub bir-bir görüntülü danışıb necə lazım olub dəstəyimi vermişəm. İstanbula da klub məni müalicəyə göndərib. Çünki 2-3 aydır ki, zədədən çox əziyyət çəkirdim. Aprelin 7-dən buradayam. Dünən sonuna qədər oyunda komandama dəstək olmuşam. “Qalatasaray”ın oyununa məni burada müalicə edən, vaxtı ilə “Qarabağ”da işləmiş həkim Murat Şahin dəvət etmişdi. “Yox” deyə bilmədim. Bura gələndən məni milli komandanın həkiminin yanına kimi aparıb. Bəlkə də “Qalatasaray” formasıyla şəkil çəkdirməyim düzgün deyildi. Amma inanın ki, “Qalatasaray” uşaqlıq sevdam olub, bu komadaya görə futbolu sevmişəm və bu stadionda oyun izləmək ən böyük xəyallarımdan biri olub".

09:03

"Turan Tovuz"un kapitanı Şəhriyar Əliyev komandasının matçı olan zaman Türkiyəyə səfər edib.

Prosport.Az-ın xəbərinə görə, futbolçu Premyer Liqanın XXXI turunun "Araz-Naxçıvan" – "Turan Tovuz" (1:1) matçı olan zaman İstanbula səfər etməyi lazım bilib.

Komandanın kapitanı Bakıda komandasını dəstəkləmək əvəzinə, azarkeşlik etdiyi "Qalatasaray"ın Türkiyə Super Liqasında "Bodrum"u 2:0 yendiyi matçda olub.

Onu da bildirək ki, Şəhriyar Əliyev yanvardan bəri zədəlidir və komandasına kömək edə bilmir.