AFFA daha bir əcnəbi ilə anlaşmaq üzrədir. Uzun müddətdir danışıqlar aparılan portuqaliyalı mütəxəssis bir həftədən artıqdır ölkəmizdədir.

Prosport.Az futbolinfo.az-a istinadən xəbər verir ki, kimliyi gizli saxlanılan mütəxəssis texniki direktor postuna təyin edilmək üçün gətirilib. Uzun illər Bernard Lippertin səmərəsiz çalışdığı, onun gedişindən sonra Cahangir Həsənzadənin tutduğu post yenidən əcnəbiyə tapşırılır. Bu o deməkdir ki, Həsənzadə vəzifədən uzaqlaşdırılacaq, bütün milli komandalara cavabdehlik portuqaliyalıya həvalə olunacaq.

Təyinatın rəsmən elan olunmasının niyə yubandığını bilmirik. Lakin AFFA prosesi ən azı yaya kimi uzatsa, daha yaxşı olar. Çünki yeni texniki direktor milli komandamızın baş məşqçi Fernandu Santuşun istəyi ilə gətirilir. Portuqaliyalıların birgə daha faydalı olacağı, seçimin bütün yığmaların koordinasiyalı çalışmasına hesablandığı deyilir. Burada yerinə oturmayan məqam Santuşun taleyidir.

Milli komandamızla ən uğursuz debüt edən Santuşun qovulması aktualdır. AFFA rəhbərliyi də son nəticələrdən narazılığını ifadə edib, yaydakı yoxlama oyunlarının ardınca baş məşqçi istefaya göndərilə bilər. Belədə özü yol üstdə olan birinin arzuladığı kimisə məsul posta təyin etməyin nə adı var?