Misli Premyer Liqasının XXX turunda keçirilən “Kəpəz” – “Araz-Naxçıvan” (0:0) matçından sonra meydan sahibi komandanın baş məşqçisi Azər Bağırov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– Çempionatın liderlərindən olan komandaya qarşı uşaqlar möhtəşəm oynadılar. Epizodları qola çevirə bilməsək də, futbolçular yaxşı oynadı. Düşünürəm ki, 2 xal itirdik.

– Oyunun sonlarında top saxlaya bilən iki oyunçunuz – Luis Paçu və Rati Ardazaşvillini meydandan çıxardınız. Nəyə hesablanmış addım idi?
– Oyunun gedişatında futbolçular yenilənməlidir. İlk dəqiqələrdəki güclə bu bir deyil. İstədik ki, hücumda sürəti daha da artıraq. Hətta bəzi epizodlarda bu istəyimiz alındı. Sadəcə, qol vura bilmədik.

– Sadəcə, birdən-birə ikisini dəyişməyiniz maraq doğurdu…
– Daha çox üstünlük yaratmaq üçün belə addım atdıq. Sadiq də, Ehtiram da pis təsir bağışlamadı.

– Camal Cəfərovun 3 epizodu oldu, amma dəyərləndirə bilmədi. Onun haqda nə düşünürsünüz?
– Texniki keyfiyyətlərdir. Gənc deməzdim. Artıq 22 yaşı var. Sadəcə, qol duyumu və epizodu hiss etməkdə bir az geri qalır. Məncə, gənclərə daha çox şans yaratmaq lazımdır.

– Muhammadu Banın durumu necədir?
– Sabahdan məşqlərə başlayacaq. Ümumən durumu normaldır. Sadəcə, topuğunda şiş var.