Misli Premyer Liqasının XXX turunda keçirilən “Turan Tovuz” – “Sabah” (2:1) matçından sonra meydan sahibi komandanın baş məşqçisi Qurban Berdiyev jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– Layiqli qələbə qazandıq. Halbuki yaxşı başlamamışdıq. 2-ci hissədə oyunun gedişatını tamamilə dəyişə bildik.

– Sonuncu dəfə nə vaxt qırmız vərəqə almışdınız və həmin epizodda nə baş verdi?
– İlk dəfə idi. Emosiyalar idi. Bu cür davranmalı deyildim. Bir neçə dəfə oyunçularıma qarşı açıq ayaqla oynasalar da, hakim sakit qalırdı.

– Uzun müddətdir ki, qələbə qazana bilmirdiniz. Bu qələbə komandanın geridönüşünə kömək edə bilər?
– Buna güman edirəm. Çünki psixoloji təzyiq var idi. Bundan sonra aradan qaldırıldı.

– Bu dəfə oyunu kənardan izlədiniz. Komandanızı necə gördünüz?
– 4-lü müdafiəyə keçdik və hücumları artırdıq. Tribunadan baxmağa gəlincə, bir də orada olmaq istəməzdim.

– Çempionatda 3-cü olmaq realdır, yoxsa “Qarabağ” və “Araz-Naxçıvan”ın Kuboku qazanmasını gözləmək?
– Biz heç kimdən asılı olmaq istəmirik. Kiminsə uğursuzluğuna yox, öz oyunumuza köklənirik.