Misli Premyer Liqasının lideri “Qarabağ”da yenilənmə işləri davam edir.

Prosport Az futbolinfo.az-a istinadən xəbər verir ki, mövsümün sonunda Ağdam təmsilçisində ciddi dəyişikliklər gözlənilir.

Legioner limitinin ləğvi səbəbindən bir neçə yerli, eyni zamanda əsas heyətə düşə bilməyən bəzi əcnəbilərlə yolların ayrılması, çox sayda legionerlərin gətirilməsi istisna edilmir. Klubun planlarında olmayan ayrılıqlar da qaçılmaz görünür. Daha əvvəl Kevin Medina, Yassin Benzya, Patrik Andrade kimi aparıcı simaların ayrılmaq barədə düşündüklərini xəbər vermişdik.

“Qarabağ”la müqavilə müddəti yaya qədər olan adıçəkilən əcnəbilər yalnız daha yüksək məvacib qarşılığında qalmağa razı olacaqlar. Onların niyə bu cür davrandıqları da məlum olub. Məsələ burasındadır ki, ilin əvvəlində komandaya qaytarılan Kadnin illik qazancı 1 milyon avronu keçir. Bunu nəzərə alan Medina, Benzya və Andrade özlərinə qarşı da eyni münasibətin göstərilməsini istəyir. Onlar maaşlarının nəzərəçarpacaq dərəcədə artmayacağı halda başqa variantlara üstünlük verəcəklər.

Qeyd edək ki, “Qarabağ” Kadini fevralda Macarıstan “Ferensvaroş”undan alıb.