Misli Premyer Liqasının XXIX turunda keçirilən “Qarabağ” – “Zirə” matçından (1:0) sonra meydan sahibi komandanın baş məşqçisi Qurban Qurbanov jurnalistlərin suallarını cavablandırıb.
Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.
– Futbolçularımı təbrik edirəm. Gərgin oyun oldu. Rəşadı da təbrik etmək istəyirəm. Get-gedə daha mübariz komanda formalaşdırır. Çox ağıllı, düzgün müdafiə qurulub. Uğurlar arzulayıram. Azarkeşlərimizə də təşəkkür edirəm.
– Kadinin gəlişindən sonra Yassin Benziyanın mövqe dəyişməsi oyunçuya necə təsir edir?
– Benziyanın həmin mövqedə olmasından çox razıyam. Sadəcə, bu gün yorğun idi. İstədiklərimi meydanda yetirmə qabiliyyəti güclüdür.
– Kadinin zədəsi ciddidir?
– Ciddiyə oxşamadı.
– Ölkə kubokunun cavab oyununu əcnəbi hakimin idarə etməsini istəyərsiniz?
– Xeyr.
– İntizam Komitəsi planşeti qırmağınıza görə sizi cəzalandırmadı. Bu sizin nüfuzunuza görədir?
– Niyə etsin? Orada təkcə hakimə deyil, oyunçuma da hirsləndim. Bu sanki oyundankənar epizod idi. Cəza olsaydı da, problem yox idi. Bundan əvvəlki “qırmızı”lara etirazımı bildirmişdim. Hələ də sözümdə qalıram.
– AFFA İcraiyyə Komitəsinin üzvü kimi 1 ili başa vurdunuz. Bu müddət ərzində ölkə futboluna nə qazandırdınız?
– 1 ilə nəsə etmək asan deyil. Sadəcə, ümumi gedişat necə qurulur, gələcəyə necə baxılır mövzusunda işlər gedir. Bunlar da bir neçə il sonra bəhrəsini verəcək.
– Əsas rəqibinizi 15 xal qabaqlayırsınız. Bu xal fərqi komandaya gələcək oyunlarda necə təsir edəcək?
– Ciddi rəqəmdir. Bəlkə də futbolçularda bir az arxayınlıq var. Amma çox üzərlərinə getmirəm. Çox gərgin mövsüm keçirdik. Hətta bəzən görürəm ki, futboldan doyurlar. Onlar da insandır. Futbolçulardan bəzən çox şey tələb edəndə hirslənirlər. Bu, normaldır. Özümüzdə də belə hallar baş verir. Məşqçi olaraq çalışıram ki, heyəti toparlayım. Amma bəzən mənim də hazırlıqsız vaxtlarım olur. Biri var çoxlu tələblə meydana çıxırlar, biri də var sərbəst. Düşünürəm ki, sərbəstliyin xeyri olacaq.
– Sizə Çempoionlar Liqasına I, yoxsa II təsnifat mərhələsindən başlamaq daha yaxşıdır?
– Bizə sərf edən minimum III mərhələ olardı (gülür). Çünki ən azından bilərdik ki, Avropa Liqasının əsas mərhələsini təmin etmişik. Amma nə qədər gec başlasaq, o qədər yaxşı olar. I mərhələdən başlasaq, bizim üçün vaxt azlığı olacaq. Amma belədə II raunddan başlamaq yaxşı olardı.
– Azarkeşlər sizdən hər iki kuboku qazanmağı tələb edir. Onlara söz veririrsiniz?
– Mən heç vaxt ikisini qazanmaq istəmədiyimi deməmişəm. Azarkeşlər məndən tələb etmirlər. Sadəcə, qalib gəlməyimizi istəyirlər. Mən də bunu istəyirəm. Kompromisə getmək lazım deyil.