Misli Premyer Liqasının XXIX turunda keçirilən “Qarabağ” – “Zirə” (1:0) matçından sonra qonaq komandanın baş məşqçisi Rəşad Sadıqov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– Rəqibi təbrik edirəm. Ağır oyun oldu. “Qarabağ”la heç bir oyun asan keçmir. Amma futbolçularım əla mübarizə apardı. Oyun rəqibin üstünlüyü ilə keçirdi. Biz daha çox mərkəzdə etibarlı olub, əks-hücumlara bel bağlayırdıq. Artıq 5-ci oyunda “Qarabağ” standart vəziyyətdən 9-cu qolu vurur. Hələ də bunu həll edə bilmirik. Bu gün buradan məğlubiyyət hissi ilə ayrılmıram.

– Penaltini qaçıran oyunuçunu bağışlamaq olar?
– Niyə olmur ki? Özüm də qaçırmışam, ulduz futbolçular da qaçırıb. Təkcə penalti yox, başqa fürsətlərimiz də oldu. Sadəcə dəyərləndirə bilmədik.

– Ötən mövsüm də avrokuboklarda göründü ki, penalti sarıdan əziyyət çəkirsiniz. Bunun həll yolu yoxdur?
– Mənə görə penaltinin məşqi yoxdur. Məsələn, mən məşqlərdə vururdum. Amma oyunda həyəcanlı olurdum. Qismət Alıyev komandada çox kritik penaltilər yerinə yetirib. Bunun üzərində dayanmaq istəmirəm.

– Yusuf Lavalla son transferinizi bu mövsüm meydanda görəcəyik?
– Son transferimiz 2 ay məşqlərdən kənarda qalmışdı. Bu daha çox gələcəyə yönəlik transfer idi. Lavalın isə müalicəsi gedir. Hazırda bərpa prosesi keçirir.

– Bu gün “Zirə”nin ən yaxşı halını görürük. Bu stabilliyi sona qədər görə biləcəyik?
– Çempionatda qələbə qazanmaq çətindir. Stabil olduğumuzu deyə bilmərəm. 7 oyuna 1 qələbəmiz olub. Gələcəklə bağlı danışmaq çətindir.

– Avrokuboklar üçün bu heyət yetərlidir?
– Bir şey bitməmiş bu haqda danışmaq doğru olmaz. Qarşıda ağır səfərlər var. Heç ağlımdan da keçmir. Bütün fikrimizi oyunlara vermişik.