“Litva ilə oyunun önəmi çox böyükdür”.

Prosport.Az xəbər verir ki, bu sözləri qadın futbolçulardan ibarət Azərbaycan yığmasının baş məşqçisi Siyasət Əsgərov UEFA Millətlər Liqasının qrup mərhələsində Litva yığmasına qarşı bu gün keçiriləcək oyunla bağlı deyib.

Mütəxəssis çox önəmli matça çıxacaqlarını bildirib: “Ardıcıl 2 səfər görüşü keçirəcəyik. 4 gün sonra Monteneqro kollektivinin qonağı olacağıq. Ancaq indi bütün diqqətimizi Litva ilə qarşılaşmaya yönəltmişik. Litva ilk matçda Monteneqroya məğlub olub. 3 komandalı qrupda yer aldığımızdan, bugünkü oyunun önəmi çox böyükdür. Bəzi itkilərimiz olsa da, komandaya cəlb olunan futbolçuların bu boşluğu dolduracaqlarına inanıram. Düşərgədə ab-hava yüksəkdir, heyətdə yer alan oyunçuların heç birinin zədəsi yoxdur. Rəqibi təhlil etmişik, zəif və üstün cəhətlərini bilirik. Məşq proseslərini də buna uyğun qurmuşduq. Rəqibi səhv buraxmağa məcbur edə bilsək, istədiyimiz nəticəni qazanacağıq”.

Qeyd edək ki, Vilnüsdəki “Jalqiris” stadionunda keçiriləcək Litva – Azərbaycan oyunu Bakı vaxtı ilə saat 19:30-da başlayacaq.