Futbol üzrə Azərbaycan II Liqasında çıxış edən “Haypers Quba” klubunun prezidenti Ayaz Abdullayev 5 oyunluq cəzalanıb.

Prosport.Az xəbər verir ki, bu barədə AFFA İntizam Komitəsinin iclasında qərar qəbul olunub.

Klub prezidentinin cəzalanmasına səbəb onun XIX turun “Ağdaş”la oyunundan sonra hakimi təhqir etməsi olub. Klub rəsmisinə bu hərəkətinə görə 3-ü şərti olmaqla 5 oyun cəza verilib. Həmçinin “Haypers Quba" 400 manat cərimələnib. Sınaq müddəti 3 ay təyin edilib.

Komandanın məşqçisi Rəsul Babazadə isə meydana daxil olaraq hakimi təhdid etdiyinə görə 2 oyun cəzalanıb, klub 100 manat cərimələnib. Bununla yanaşı, Quba təmsilçisinin futbolçusu Baxşəli Baxşəliyev “Ağdaş”la oyununun 89-cu dəqiqəsində ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb, klub 150 manat cərimələnib.

Komandanın digər üzvü Xaqan Məmmədov isə ikinci "sarı"dan qırmızı vərəqə aldığı üçün 1 oyun cəzaya məruz qalıb. Onun hərəkəti klubu 50 manat ziyana salıb. Həmçinin 5 futbolçusu sarı vərəqə aldığı üçün Quba təmsilçisi əlavə 70 manat da ödəməli olacaq. 

Bundan başqa, meydançaya kənar şəxslər daxil olduğuna görə klub əlavə 80 manat da cərimələnib.