Azərbaycan Kubokunun yarımfinal mərhələsinin “Araz-Naxçıvan” – “Qarabağ” oyunundan (1:0) sonra qonaq komandanın baş məşqçisi Qurban Qurbanov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib…

– “Araz-Naxçıvan”ı qələbə münasibətilə təbrik edirəm. Çox vuruşdular, qələbə üçün hər şeyi etdilər. Cavab oyunu var. Üzərimizə düşən odur ki, rəqibi təbrik edək. Çox danışılası şey yoxdur. Düzü, keyfiyyətli oyun olmadı. Kubok matçları çempionat oyunlarından seçilir. Cavab oyununa hazırlaşacağıq. Ona kimi xeyli vaxtımız olacaq.

– Avrokuboklarda “Qarabağ”a qarşı ədalətsiz qərarlar çox olub, amma heç birində planşet sındıraraq reaksiya verməmisiniz. Fikirlər var ki, Qurban Qurbanov yerli klublara məğlubiyyəti qəbul edə bilmir…
– Dəfələrlə məğlub olmuşam və özümü normal aparmışam. İnsanıq, aqressiya olur. Sadəcə, elə epizodlar var ki… Ola bilər, penalti idi, yanılırıq. Bizə gəlib hər şeyi anladanda deyirlər ki, penalti kosmosdan görünməlidir. Elə epizodlar oldu ki… Mən də istəyirəm oyun dinamik getsin. Amma oyun gah dayanır, gah belə olur. Çoxlu pauzalarda hakim də ritmini itirir. Yerli komandalara məğlubiyyəti qəbul edə bilirəm. Çox istəyirəm ki, klublarımız “Qarabağ”a qalib gələ bilsin, maraq olsun. Aqressiyaya gəlincə, biz də insanıq. Ömürboyu sakit dura bilmərik. Normal epizoddur. Görürsünüz, sizin üçün də maraqlı oldu.

– Penalti epizodunu necə dəyərləndirirsiniz?
– Planşetti elə penaltiyə görə vurdum.