“Neftçi” mövsümün sonunda aparıcı futbolçularından Yuri Matiası itirə bilər.

Prosport.Az futbolinfo.az-a istinadən xəbər verir ki, braziliyalı mərkəz müdafiəçisi paytaxt klubunda qalmaqda maraqlı deyil.

İki ildir ölkəmizdə “ağ-qaralar”ın formasını geyinən 30 yaşlı oyunçu artıq komandasını dəyişmək barədə düşünür. Onu buna vadar edən iki səbəb var: birincisi komandanın uğursuz çıxışı, ikincisi isə ailəsindən uzaq qalması.

Düzdür, “Neftçi” Matiasla əməkdaşlığın davamında israrlıdır. Lakin futbolçu özü uğursuz nəticələr fonunda qalmağa müsbət yanaşmır. Onun ilk istəyi Avropanı tərk edərək, vətəninə dönməkdir. Çünki ailəsi ilə birgə yaşamaq istəyir. Ancaq bunun üçün Braziliyadan sərfəli təklif gəlməlidir. Futbolçunun “Neftçi” ilə müqavilə müddəti mövsümün sonuna qədər olduğundan, yayda azad agent statusu daşıyacaq. Matias başqa variantları üstün tutduğundan, “Neftçi”nin yeni müqavilə təklifini hələlik qəbul etməyib.

Qeyd edək ki, Yuri Matias “Neftçi”yə 2023-cü ilin yayında Rumıniyanın ÇFR klubundan keçib.