Azərbaycan millisinin sabiq futbolçusu Dimitri Nazarov yenidən komandasını dəyişəcək.

Prosport.Az Almaniya mətbuatına istinadən xəbər verir ki, Regionalliqa klubu “Offenbax” 34 yaşlı yarımmüdafiəçiyə yeni müqavilə təklif etməkdə maraqlı deyil.

Buna səbəb veteran futbolçunun əvvəlki formasından uzaq olmasıdır. Nazarov mövsümə yaxşı başlasa da, son vaxtlar oyununda eniş yaşanır. Əslində baş məşqçi Kristian Neidhart millimizin sabiq üzvünün ümumi performansından narazı deyil. Lakin onun yaşının çoxluğunu nəzərə alan rəhbərlik yeni sözləşmə təklif etməyi planlaşdırmır. Əvəzində Almaniya komandası həmin mövqeyə daha gənc oyunçu gətirməyi hədəfləyir.

Qeyd edək ki, 2023-cü ildən “Offenbax”ın formasını geyinən Dimitri Nazarovun müqavilə müddəti yaya qədərdir. O, cari mövsüm çempionatda 10 qola imza atıb.