Misli Premyer Liqasının XXVIII turunda keçirilən “Kəpəz” – “Səbail” (1:1) matçından sonra nominal meydan sahibi komandanın baş məşqçisi Azər Bağırov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– İki fərqli hissə oynadıq. İlk yarıda daha yaxşı idik. İkinci hissədə isə əks-hücumlardan yararlana bilmədik. Qolu da standart vəziyyətdən buraxdıq. Yəqin ki, rahatlıq istəmirik… Bu oyunda qələbə qazanıb, daha rahat ola bilərdik.

– “Neftçi”ni, “Sabah”ı məğlub edə, “Qarabağ”dan xal ala bilirsiniz, amma “Səbail”lə bacarmırsınız…
– Həmişə belə oyunlarda psixoloji gərginlik olur. Ona görə də komanda “Qarabağ”, “Neftçi” və “Sabah”la daha rahat oynayır. Burada isə xal itirməkdən qorxurlar.

– Transfer danışıqlarını hansı istiqamətdə aparırsınız?
– Sırf mərkəz müdafiəçi ilə bağlı problemimiz var idi. Bu gün İlkin Qırtımov zədəli şəkildə meydana çıxdı. Yerli oyunçu sarıdan kifayət qədər problemlərimiz var.

– 90 dəqiqəni eyni tempdə keçirməyə nə mane olur?
– Hər iki hissəni eyni tempdə keçirdik. Sadəcə, ikinci hissədə əks-hücumlardan yararlana bilmədik. Hansı ki, Trentin ikiyə bir getdiyi epizod buna nümunədir. O mənada iki fərqli hissə izlədik.

– “Sumqayıt”a məğlubiyyətdən sonra demişdiniz ki, komanda daxilində problemlər var. Həmin problemlər nə idi?
– Komandadaxili problemlərdən danışmağa dəyməz. Sadəcə, futbolçulara siqnal idi. Onlar da buna riayət etdilər. Hesab edirəm ki, komandadaxili problemlər bizimlə qəbirə qədər getməlidir.

– Xvalkonu ehtiyatda saxlayıb, İlkini startda oynatmağınız nəyə görədir?
– “Qarabağ”la oyunda İlkin daha yaxşı çıxış etdi. Həm limitə görə belə seçim etdik. Əgər İlkin arxada olmasaydı, Anuşu irəlidə oynada bilməzdik.

– Düşünmürsünüz ki, bu, Xvalkoya mənfi təsir edər?
– Xeyr. Xvalko komandanı sevir. Bu gün İlkini arxada oynatmaqla, rotasiyalar edə bilirik. Yaxud da ön xətdə yerli oyunçuları oynatmaqla, arxada çətinlik çəkirik

– Çox bitkin görünürsünüz. Problemlər davam edir?
– Xeyr, problemlər yoxdur. Sadəcə, nəticə məni məyus edir. 1 səhv və 1 qol. Şükürlər olsun ki, heç bir problemimiz yoxdur. Zaman daraldıqca, oyunçular daha məsuliyyətli olmalıdır. Qarşıda 8 tur var. Hələ heç nə bitməyib. Gəncədə böyük futbol qalmalıdır.

– Sizcə, elitada qalmaq üçün 5 xal nə qə dərəcədə üstünlük sayılır?
– Böyük üstünlük deyil. 2 oyun uduzub, bunu itirə bilərik.