Misli Premyer Liqasının XXVIII turunda keçirilən “Kəpəz” – “Səbail” (1:1) matçından sonra qonaq komandanın baş məşqçisi Elvin Məmmədov jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə oyunla bağlı fikirlərini bölüşüb.

– Hamını Ramazan bayramı münasibətiylə təbrik edirəm. Çətin rəqiblə qarşılaşdığımızı bilirdik. Bəzi sözlərdən istifadə edə bilməyəcəyəm. Üzrlü sayın. Bu da təcrübəsizlikdən irəli gəlir.

– Bura sırf 1 xal üçün gəlmişdiniz?
– Xeyr. Bu gün bu barədə danışmaq asan olar. Amma futbolçular əziyyət çəkir. 3 xal üçün gəlmişdik. Şükürlər olsun ki, uduzmadıq.

– Komanda sizdə qalsaydı, indi daha yaxşı durumda ola bilərdi?
– Keçmiş keçmişdə qaldı. Rəhbərlik sağ olsun, həm o vaxt, həm də indi mənə şans verdi. Təşəkkür edirəm. Bu haqda nə isə demək çətindir. Bəlkə daha yaxşı, bəlkə daha da pis ola bilərdi.

– Komandanın psixoloji durumu aşağıdır. Bunu toparlaya bilirsiniz?
– Həqiqətən bunun üzərində çox işləyirik. Futbolçu uduzduqca konkret çökür. İnşallah ki, bunun öhdəsindən gələrik.

– Cavid Hüseynovla söhbətiniz olub?
– Bizim dostluğumuza şübhəniz olmasın. Məm Caviddən öncə də burada idim. Bu gün Cavidin getməsi dostluğumuza xələl gətirmir.

– Təkrar start heyəti qursaydınız, Mirabdulla ilə Nihatı yenə meydanda görərdik?
– Hər ikisinə güvənirəm. Niyə də olmasın? İkinci hissədə yaxşı təsir bağışladılar.