Martın 18-də ölkənin idman siyasətini həyata keçirən 2 dövlət qurumu – Gənclər və İdman Nazirliyi və Milli Olimpiya Komitəsi (MOK) müvafiq olaraq idman səfirlərini və Atletlər Komissiyasının üzvlərini seçdi.

Prosport.Az-ın xəbərinə görə, nazirliyin Kollegiya iclasında 11 namizəd arasından 5 nəfər – Aliyə Paşayeva (bədii gimnastika), Fəridə Əzizova (taekvondo), Orxan Səfərov (cüdo), Dadaş Dadaşbəyli (ağırlıqqaldırma) və Xəyyam Orucov (milli idman növləri) 2025-ci il üçün “İdman səfiri” seçilib.

Ötənilki siyahıda yer alan İlqar Qurbanovu (futbol) bu dəfə Dadaş Dadaşbəyli əvəzləyib. Bunu İlqar Qurbanovun artıq millidə ötən ilin iyulundan futbol üzrə əsas millinin direktoru işləməsi ilə əlaqələndirmək olar.

Eyni gündə MOK da özünün Atletlər Komissiyası üçün iclas keçirdi. İclasda 2025-2028-ci illər üçün Rüstəm Orucov (cüdo) komissiyanın sədri, Fəridə Əzizova (taekvondo) sədr müavini, Leyla Əliyeva (cüdo), İradə Aşumova (atıcılıq), Hacı Əliyev (güləş), Nazim Babayev (atletika), Təranə Abbasova (ağırlıqqaldırma), Fatimə Alkərəmova (üzgüçülük) və Rəsul Çunayev (güləş) komissiyanın üzvləri seçildi.

Gələcəkdə Avropa Atletlər Komiitəsinə üzvlüyünün verilməsi də gözlənilən Rüstəm Orucovun ölkə xaricində olması səbəbindən, iclas sədrsiz keçirildi. Seçilən Leyla Əliyeva, İradə Aşumova, Hacı Əliyev və Təranə Abbasova yeni üzvlərdir.

Artıq son 3 Olimpiadada yox, ümumiyyətlə Olimpiadada iştirak etmiş veteran idmançılar da burada yer ala bilər. İradə Aşumova və Təranə Abbasovanın burada yer alması məhz bu səbəbdəndir.

Əvvəlki üzvlərin sayı ilə müqayisədə rəqəm də 7-dən 9-a yüksəlib. Üzvlükdən çıxarılan şəxslər isə Zöhrə Ağamirova (bədii gimnast) və Kamran Şahsuvarlıdır (boks). Əldə etdiyimiz məlumata görə, onların üzvlükdən çıxarılma səbəbi iclaslara qatılmamaları olub.