Azərbaycan millisinin baş məşqçisi Fernandu Santuş Haitiyə uduzduqları yoldaşlıq oyunundan (0:3) sonra jurnalistlərin suallarını cavablandırıb.
Prosport.Az xəbər verir ki, mütəxəssis matçla bağlı bunları söyləyib.
– Dünən start heyəti müəyyənləşdirdiyinizi demişdiniz. Yuxunuzda bu hesabı görsəydiniz, heyəti dəyişərdiniz?
– Əlbəttə, dəyişiklik edərdim. Komanda məşqlərdə özünü yaxşı göstərirdi. Oyundan sonra çox şey demək olar. Düşünürəm ki, komandam meydana məğlub olmaq üçün çıxmışdı. İlk hissədə daha yaxşı oynadıq. Qol imkanlarını dəyərləndirə bilmədik. 2-ci hissədə hücum xəttinə oyunçular buraxdım. Cinahdan asmalardan istifadə etmək istəyirdik. Yarımmüdafiədə də dəyişilik etdik ki, intensivlik artsın. 2-ci hissənin əvvəlində eyni səviyyəli oyun oldu. 2-ci qoldan sonra komanda ruhdan düşdü. Xəyal Əliyev, Səbuhi Abdullazadə meydana daxil olandan sonra hücumda aktiv olduq. Hücumları sonlandıra bilmədik. Uşaqlar çalışdılar.
– Adətən 5-li sistem oynadırdınız, bu gün isə 4-lü sistemi seçdiniz. Heyətlə bağlı seçimlərinizi nə ilə əlaqələndirə bilərsiniz?
– 5-li sistemlə 2 oyun oynamışıq. Rahil Məmmədovu müdafiənin cihanında oynatdıq. O, mərkəzdə və cinahda oynaya bilir. Elvin Cəfərquliyevə hücumda sərbəstlik vermək istədik. Oyunçularıma inanıram və potensiallarını bilirəm. Ona görə bu sistemlə oynadıq. Əsas heyətdə çıxanlar təcrübəli futbolçulardır. Az oynamalarına baxmayaraq, təcrübələri var. Məşqlərdə özlərini yaxşı göstərirdilər.
– Elvin Cəfərquliyev bu dəfə yoldaşlıq oyununda qırmızı vərəqə aldı. Buna necə izah verərdiniz?
– Elvinlə danışdım və bunun yolverilməz olduğunu dedim. Bir şeyə görə oyunçunu öldürə bilmərik.
– Gələcəyin komandasını quracağınızı demişdiniz. Amma heyətdə 3 rus, 1 türk futbolçu var. Onların 3-nün yaşı 30-dan yuxarıdır. Bu oyunçularla gələcəyin komandasını quracaqsınız?
– Ozan Kökçünün 27, Şahruddin Məhəmmədəliyevin 29 yaşı var. İnkişaf istəyiriksə, təcrübəlilərdən də istifadə etməliyik. Heyətdə gənc oyunçular da var idi.
– Qeyri-azərbaycanlıların oynadılması nə dərəcədə düzgündür?
– Bədəvi Hüseynov, Şahruddin çox təcrübəli və güclü oyunçulardır. Gənclər milliyə gələndə onlardan dəstək görməlidir. Dünya praktikasında da milliləşdirilmiş oyunçular var. Pepe 40 yaşına kimi Portuqaliya yığmasında oynayıb, amma braziliyalıdır. Bir oyunçu milliyə sevgi ilə yanaşırsa, problem yoxdur.
– Belarusla oyunda heyətdə dəyişikliklər olacaq? I Liqadan – “Qəbələ”dən dəvət alan Şahin Şahniyarovu meydanda görəcəyik?
– Növbəti oyunda dəyişikliklər olacaq. Matç istədiyimiz kimi getsə, Şahin də şans qazana bilər. İstedadlı oyunçudur. Strateji cəhətdən dəyişikliklər mənim məsuliyyətimdədir. Bugünkü matçda 4-4-1-1 oynamaq istəyirdik, alınmadı.
– Haitinin 3-cü qolundan sonra azarkeşlər rəqibi alqışladı. Nə vaxtsa rəqib azarkeşlər bizi alqışlayacaq və həmin vaxt baş məşqçi siz olacaqsınız?
– Əlbəttə, futbolda belə hallar olur. Azarkeşlər də yığmadan qələbə gözləyir. Ümid edirəm ki, bizdə də ardıcıl qələbələr olsa, rəqibin də səviyyəsi eynidirsə, alqışlayarlar.
– 1 ildir ki, yığmadasınız. Millidə nəyi dəyişə bilmisiniz? Azarkeşləri nə vaxt qələbə ilə sevindirəcəksiniz?
– İnanıram ki, dəyişiklik etmək olacaq. Oyunçuların potensialına görə düşünürdüm ki, hücum futbolu oynaya bilərik. Amma fikirləşirəm ki, müdafiədə qalıb, əks-hücuma çıxmaq daha yaxşı olar. Dəyişiklər olacaq. Rəqiblərlə başabaş mübarizə aparmaq istəyirik. Məşqçi olaraq dəyişiklik etməliyəm. Növbəti oyunlarda bunu edəcəyəm. Daha çox müdafiədə oturub, əks-hücumlara üstünlük verəcəyik.