“Şamaxı”nın yeni transfer cəhdi uğursuzluqla nəticələnib. Bölgə klubu müqavilə bağlamaq üçün gətirdiyi legioneri geri göndərməyə qərar verib.

Prosport.Az futbolinfo.az-a istinadən xəbər verir ki, Premyer Liqa klubu ötən ay 150 min dollara Rusiyanın “Fakel” klubuna satılan Belaydi Pusinin boşluğunu Kolin Andersonla doldurmağı planlaşdırmışdı. Lakin yamaykalı hücumçu tibbi baxışdan uğurla keçsə də, transferi alınmayıb. Sənədlərində problem aşkarlanan legioner bu gün vətəninə yola salınacaq.

25 yaşlı futbolçunun özünün səhlənkarlığı üzündən yaranan problem başına bəla olub. “Şamaxı” isə demək olar ki, Premyer Liqada qalmaq vəzifəsinin öhdəsindən gəldiyi üçün əlavə xərcə düşməyi lazım bilməyib.

Qeyd edək ki, Kolin Anderson yanvarda İraqın “Ərbil” klubundan ayrılandan bəri işsiz idi.