"Bolqarıstanla oyunda 2-ci qolu vurmağımız komandanı ruhlandırdı və qələbəyə inamı artırdı".

Prosport.Az xəbər verir ki, bunu Azərbaycanın 17 yaşadək qızlardan ibarət millisinin baş məşqçisi Nərgiz Qurbanova Bakıda təşkil edilən Avropa çempionatının II seçmə mərhələsində Bolqarıstan yığması (3:2) ilə keçirilən oyunla bağlı deyib.

Mütəxəssis rəqibi öncədən təhlil etdiklərini vurğulayıb: “Bolqarıstanla çətin oyunda qalib gəldik. Rəqibi öncədən təhlil etmişdik və bizi gərgin mübarizənin gözlədiyini bilirdik. Bolqarıstan yığması ilk matçla müqayisədə bizə qarşı əsas heyət oyunçularını meydana buraxmamışdı. Bu da onların görüşə rahat çıxdıqlarını göstərirdi. Fürsəti lazımınca dəyərləndirərək ilk hissədə əks-hücumdan qol vurduq. 2-ci hissədə bolqarların əsas heyət üzvləri mübarizəyə qoşuldu. Buna baxmayaraq, 2-ci qolu vurmağımız komandanı ruhlandırdı və qələbəyə inamı artırdı. Son dəqiqələrdə hesabda bərabərlik yaransa da, sona qədər eyni ruh yüksəkliyi ilə çıxış etdik. Nəticədə qələbə qolunu vurmağı bacardıq”.

Qeyd edək ki, B Liqasının II qrupunda yer alan millimiz ilk 2 turdan sonra 3 xalla 2-ci pillədə qərarlaşıb. Komanda son turda sabah autsayder Malta ilə qarşılaşacaq.