“Zirə” PFK-da yeni təyinat rəsmiləşib.

Seyidağa Babayev “Zirə” PFK-nın vitse-prezidenti təyin edilib. Bəs Seyidağa Babayev kimdir? Prosport.Az kiçik araşdırma ilə onun təqdimatını edir.

S.Babayev "Zirə"yə yad sima deyil. Belə ki, daha əvvəl də bu klubda başqa vəzifələrdə işləyib.

S.Babayev əvvəllər futbolçu olub və 15, 17 yaşadək millilərimizin heyətində yer alıb. Daha sonra o, böyük futboldan futzala keçib. Babayev "Turan Air"də çıxış etməklə futzal millimizə də dəvət alıb. Ancaq qərarsızlığı onun yenidən böyük futbola qayıdışına rəvac verib. İranın I dəstəsində, həmçinin bizim MOİK klubunda çıxış edib. Futbolçu karyerasını bitirdikdən sonra yeni yaradılmış "Zirə"də icraçı direktor və Akademiya koordinatoru vəzifələrində çalışıb. 2016-2018-ci illərdə futboldan uzaqlaşaraq şəxsi biznesi ilə məşğul olub. Həmçinin, Azərbaycan Minifutbol Federasiyasının təşkil etdiyi Biznes Liqada çalışdığı "Gate Baku" şirkətinin oyunçusu kimi çıxış edib.

Onun peşəkar futbolda son iş yeri I divizion klubu olub. 2018-ci ilin əvvəlindən artıq mövcud olmayan I divizion klubu "Şüvəlan"da icraçı direktor vəzifəsini yerinə yetirib.

Səbuhi Musa