Azərbaycan millisinin baş məşqçisi Fernandu Santuşun mətbuat konfransı keçirilib.

Prosport.Az xəbər verir ki, portuqaliyalı mütəxəssis jurnalistlərin suallarını cavablandırıb. 

– İlk dəfə milliyə I Liqadan oyunçu dəvət etdiniz. Şahin Şahniyarov hansı üstünlüklərinə görə yığmaya çağırılıb?
– Onda çox keyfiyyət gördüm. Mən və məşqçilər korpusum tez-tez aşağı liqa oyunlarına baxırıq. Orada bir çox oyunçu var ki, diqqətimizi cəlb edib. Şahin da keyfiyyətli oyunçudur. Dəvət etmişik ki, özünü necə göstərdiyini görək.

– Haiti ilə oynamaq kimin seçimi idi?
– Rəqiblər AFFA tərəfindən seçilir, sonra danışıqlar, müzakirələr aparılır. Haiti okeanın o biri tərəfində yerləşir. Çox yaxşı oyunçuları var. Yaxşı, güclü liqalarda oynayırlar. Ona görə Haiti heç də zəif rəqib deyil.

– Emin Mahmudovu zədəyə görə çağırmadınız? Zədəli olmasaydı, milliyə dəvət edəcəkdiniz?
– Yalnız Emin deyil, Abbas Hüseynov, Ceyhun Nuriyevi də vurğulaya bilərəm. Amma zədəli olduqları üçün yığmaya dəvət edilməyiblər. Fiziki cəhətdən hazır deyillər.

– Legioner limitinin ləğvi ilə bağlı fikiriniz necədir? Bu qərar gələcək işlərinizə necə təsir edəcək?
– Bu qərarın xeyrini görmək üçün yalnız gözləmək lazımdır. Amma başqa qərar da verilib, komanda sayı artırılıb. Qarşıdakı aylarda görəcəyik ki, bu qərarların nəticəsi bizim üçün necə olacaq.

– Haiti və Belarusdan başqa, hansısa yığmalardan təklif olmuşdu?
– Bayaq da buna oxşar sual oldu. Mən təklif etdim ki, 2 yoldaşlıq oyunu keçirək. O proqrama uyğun da AFFA danışıqlar apardı və komandalar seçildi. Hazırkı toplanışlar UEFA təqviminə düşür. Bir çox yığma rəsmi oyunlara çıxacaq, rəqib tapmaq çətin idi.

– Ramazan ayı davam edir. Futbolçulara oruc tutmağa icazə veriləcək?
– Əlbəttə, icazə veriləcək. Bu, normal haldır. Belə şeylərə hörmətlə yanaşıram. Bu məsələlərə diqqət etməliyik.

– I Liqanın oyunlarına gedirsiniz. Amma yalnız bir oyunçunu dəvət etmisiniz. Digərlərindən razı qalmadınız?
– U-17 Liqasını və əvəzedicilərin çempionatını da izləmişəm. Bu, Azərbaycan millisidir. Birdən-birə aşağı liqadan çox futbolçu cəlb edə bilmərik. Təcrübəli futbolçular da gənclərə köməklik etməlidir. Yaşından asılı olmayaraq, yığmanın qapıları hər bir azərbaycanlı futbolçuya açıqdır. Onlar özlərini göstərəndə dəvət alacaq.